دوای سەرکەوتنی لە هەردوو خوولی هەڵبژاردنی سەرۆکایەتی تورکیا، رەجەب تەیب ئەردۆغان وەک سەرۆک کۆماری تورکیا لە بەردەم پەرلەمانی وڵاتەکەی سوێندی یاسایی خوارد و ڕایگەیاند، پڕۆژەی سەدەی تورکیا جێبەجێ دەکەین.
ڕەجەب تەیب ئەردۆغان، سەرۆك كۆماری توركیا لە وتارێكدا ڕایگەیاند، ئەمشەو کابینەی نوێی حکومەت ڕادەگەیەنێت و ڕۆژی سێ شەممەی داهاتوو یەکەم کۆبوونەوەی کابینەکەی ئەنجام دەدات.
وتیشی، “هەرچەندە لە تورکیا خاوەنی ئۆپۆزیسیۆنێکی باش نین و بەرژەوەندی خۆیان دەخەنە پێش بەرژەوەندی گەلەوە، بەڵام لەگەڵ کۆتایی هاتنی رۆژی 28ـی ئایار، قۆناغی هەڵبژاردن کۆتایی هات و ئێمەش نیازی تۆڵەکردنەوەمان نییە و لاپەڕەیەکی نوێ هەڵدەدەینەوە”.
ئاماژەی بەوەشكرد، بەرەنگاری تیرۆر دەبینەوە. تیرۆر لە وڵاتەکەمان دوور دەخەینەوە و بەڵێن دەدەین پارێزگاری لە تورکیا بکەین.
وتیشی “خاوەنداریی لە برایەتیی دێرین و هەمیشەیی گەلەکەمان دەکەم و کار بۆ بەدیهێنانی ئاشتی دەکەین”.
ئەردۆغان باسی ئەحمەدی خانی (شاعیر و نووسەر و ڕووناکبیری گەورەی کورد) کرد و وتەیەکی ئەوی بە نموونە هێنایەوە و وتی “مرۆڤ ئامانجە، وەکو خانی دەڵێت؛ مرۆڤ ئەو نەخشەیە، کە گەورەترین قەڵەم کێشاویەتی”.
