لە خوولی دووەمی هەڵبژاردنی سەرۆكایەتی توركیادا، ڕەجەب تەیب ئەردۆغان توانی زۆرینەی دەنگەكان بەدەست بهێنێت و جارێكی دیكە كورسی سەرۆكایەتی وڵاتەكەی مسۆگەر بكاتەوە.
دوای ئەوەی لە خوولی یەكەمی هەڵبژاردنی سەرۆكایەتی توركیا، هیچ كام لە كاندیدەكان، كە 4 كاندید بووون نەیانتوانی زۆرینەی ڕەهای دەنگەكان بەدەست بهێنن، هەڵبژاردن كەوتە خوولی دووەم و ئەمڕۆش ئەنجام درا و لە كاتژمێر 5ی ئێوارە سندقەكانی دەنگدان داخران.
لە خوولی دووەمی هەڵبژاردندا هەریەكە لە ڕەجەب تەیب ئەردۆغان و كەمال كلیچدار ئۆغڵو كێبڕكێیان كرد بۆ بەدەستهێنانی زۆرینەی دەنگەكان و چوونە سەر كورسی سەرۆكایەتی وڵات.
بەپێی ئەنجامە بەراییەكان، كە دەستەی باڵای سەرپەرشتیاری هەڵبژاردنەكان بڵاویكردۆتەوە، بە جیاكردنەوەی (98%)ی دەنگەكان، ڕەجەب تەیب ئەردۆغان بە بەدەستهێنانی (52.1%)ی دەنگەكان بووە خاوەنی زۆرترین دەنگ و بووەوە بە سەرۆك كۆماری توركیا.
هاوكات، كەمال كليچدار ئۆغڵو، توانی (47.9%)ی دەنگەكان بەدەستبهێنێت، كە لە هەردوو خوولەكەدا حزبە كوردییەكانی باكووری كوردستان پشتیوانیان دەكرد.
