بەپێی وتەی شارەزایانی كەشناسی، لە كۆتایی ئەم هەفتەیەدا شەپۆلێكی نوێی باران و هەورەتریشقە ناوچەكانی هەرێمی كوردستان دەگرێتەوە و پلەكانی گەرما ڕوو لە دابەزین دەكەنەوە.
محەمەد كەمال، شارەزای كەشناسی بۆ (خەڵك) ڕایگەیاند، ڕۆژی ٣٠ی ئه‌م مانگه شه‌پۆلێكی باران و هه‌وره تریشقه به‌شێكی ناوچه‌كانی هه‌رێمی كوردستان ده‌گرێته‌وه.
لای خۆشیەوە، ئاراس جەبار، شارەزای كەشناسی بۆ (خەڵك) وتی، “بەھۆی بەردەوامی ھاتنی بارستە ھەوای گەرم و شێدار لەدەریای سوور و کاریگەری نزمە پاڵەپەستۆی دەریای ناوەراست دووبارە لە ڕۆژانی ٢٩ و ٣٠ی مانگ کەشوھەوای ناوچەکە ناجێگیر ئەبێتەوە”.
ڕاشیگەیاند، سەرەتا سنووری باکووری سعودیە و ئوردن و باشووری سوریا دەگرێتەوە بەشێوەی بارانی بەھێز و بەخوڕ کاریگەری ئەبێت لەگەل دروستبوونی لافاو لەھەندێ ناوچەی ئەم وڵاتانەدا، دواتر کاریگەری بۆ سەر ناوچەکانی ھەرێمی کوردستان و عێراق درێژ ئەبێتەوە.
ئاماژەی بەوەشكرد، ھاوشێوەی ئەم ماوەیە لەناوچەی جیاجیادا بەرێژەی دیاری نەکراو ھەورە تریشقە و تاوە باران چالاک دەبێت لەگەڵ زیادبوونی خێرایی با و بەرزبوونەوەی تۆز و خۆڵ .
