سەرۆكی لیژنەی كشتوكاڵ لە ئەنجوومەنی پارێزگای سلێمانی ڕایدەگەیەنێت، پێویستە جووتیاران بێنە مەیدان و چیتر تەماشاكار نەبن و داوای مافەكانیان بكەن .
كاسترۆ مەعروف، سەرۆكی لیژنەی كشتوكاڵ لە ئەنجوومەنی پارێزگای سلێمانی بۆ (خەڵك) ڕایگەیاند، داواكارم جووتیاران لەتەواوی شوێنەكان لەبەردەم سایلۆكانی وەرگرتنی گەنم گردبوونەوە ئەنجام بدەن و داوابكەن وەزارەتی بازرگانی عێراق بەیەكجار تەواوی گەنمی جووتیاران وەربگرێتەوە.
جەختیشی كردەوە، پێویستە وەكو تەواوی پارێزگانی تری عێراق، جووتیارانی كوردستان بە جوتیاری پلە دوو حساب نەكات.
وتیشی، “ئەركی یەكەمی وەزارەتە تایبەمەندەكان و حكومەتی هەرێمی كوردستان و نوێنەرانی كوردە لە پەرلەمانی عێراق ئەوە قبوڵ نەكەن و ناكرێت ئەو جیاوازیە قبوڵ بكرێت هەر ساڵە و بە بیانوێك جووتیارانی هەرێمی كوردستان بكرێنە قوربانی”.
كاسترۆ مەعروف ئاماژەی بەوەشكرد، لای هەموو لایەك ڕوونە بەرهەمی گەنم لەمساڵدا لەچاو ساڵی ڕابردوو زۆر زیاترە، وەرگرتنی گەنم بەچەند قۆناغێك دژایەتی كردنی بەرهەمی ناوخۆ و جووتیارانی هەرێمی كوردستانە، بۆیە داوا دەكەین بەیەك قۆناغ جووتیاران تەواوی گەنمەكانیان لێ وەر بگیرێت ئەگەر جووتیاران بێ دەنگ بن دڵنیایان دەكەمەوە زیانێكی زۆریان بەردەكەوێت.
