كۆمەڵەی فەلەكناسی سعودیە ڕۆژی وەستانی حاجییان لە كێوی عەرەفە و یەكەم ڕۆژی جەنی قوربانی ئەمساڵی دیاری كرد.
كۆمەڵەی فەلەكناسی سعودیە لە ڕاگەیەنراوێكدا ئاماژەی بەوەكردووە، یەكەم ڕۆژی جەژنی قوربانی ئەمساڵ (10ی زیلحیجە) دەكەوێتە ڕۆژی چوار شەممە، كە دەكاتە 28ی حوزەیران و بەوەش ڕۆژی پێشتر دەبێتە ڕۆژی عەرەفە.
جەختیشی كردۆتەوە، لەڕووی فەلەكییەوە ڕۆژی 10ی زیلحیجە دەكەوێتە ڕۆژی چوار شەممە 28ی حوزەیران، بەڵام بۆ ڕاگەیاندنی وادەكەی بەشێوەیی یاسایی و شەرعی دەبێت مانگ ببینرێت.
ڕوونیشی كردۆتەوە، ڕۆژی عەرەفە دەکەوێتە ڕۆژی سێ شەممە ٢٧ی حوزەیران و بە یەکێک لە پیرۆزترین ڕۆژەکانی ساڵ دادەنرێت بۆ موسڵمانان، کە ئیمانداران لەسەر چیای عەرەفات وەستاون، کە تیایدا زیکر و تەکبیر و ستایش و دوعا و قورئانی پیرۆز دەخوێننەوە.
سعودیە پێشتر ڕایگەیاندبوو، کە پێشبینی دەکات لە وەرزی حەجی ئەمساڵدا ٢٠٢٣ میوانداری زیاتر لە دوو ملیۆن حاجی بکات.
