لە سبەینێوە شەپۆلێکی دیكەی نیمچەیی بارانی بەهاری و هەورەتریشقە دەگاتە ناوچەکانی کوردستان و بۆ ماوەی دوو ڕۆژ بەردەوام دەبێت.
ئاراس جەبار، شارەزای كەشناسی بۆ (خەڵك) سەبارەت بە دۆخی كەشوهەوای ئەم هەفتەیە ڕایگەیاند، سبەی دوو شەممە ١-٥-٢٠٢٣ ئاسمانی ھەرێم پەڵە ھەور و ھەندێک کات نیمچە ھەور ئەبێت لە ھەندێک کاتدا لەناوچە شاخاوییەکاندا نمە بارانی پچڕ پچڕ و ھەورە تریشقە دەبێت.
ڕاشیگەیاند، لە ئەنجامی بەردەوامی کاریگەری بارستە ھەوای فێنک لەسەر ناوچەکانمان، پلەکانی گەرما ٢ تا ٣ پلە بەراورد بە ئەمڕۆ نزمبوونەوەی زیاتر بەخۆیەوە ئەبینێت و خێرایی با زۆربەی کاتەکان مامناوەند بۆ چالاک ئەبێت.
وتیشی، “کاریگەری ئەم بارستە ھەوا فێنکە تا ڕۆژی چوار شەممە ٣-٥-٢٠٢٣ لەسەر ناوچەکانمان ئەمێنێتەوە”.
ئەو شارەزایەی كەشناسی پێشبینی ئەوەش دەكات، “ھەر لەکۆتایی ئەم ھەفتەیەدا بارستە ھەوایەکی گەرم لەباکوری کیشوەری ئەفریقاوە ناوچەکانمان دەگرێتەوە”.
