وەزیری دارایی و ئابووری حكومەتی هەرێم ڕایدەگەیەنێت، خانەنشینان چینێكی گرنگی كۆمەڵگان و هەرچی لەدەستمان بێت بۆ خزمەتكردنیان درێغی ناكەین.
قۆناغی دووەمی كارتی ئەلكترۆنی مووچەی خانەنشینانی سلێمانی تەواو بووە و لە ئێستادا ٧ هەزار خانەنشینی شارستانی لە سنوری پارێزگای سلێمانی مووچەكانیان لە ڕێی كارتی ئەلكترۆنیەوە وەردەگرن.
ئاوات جەناب نووری، وەزیری دارایی و ئابووری لەمیانی كۆبوونەوەی لەگەڵ بەڕێوەبەری خانەنشینی سلێمانی و بەڕێوەبەر و نوێنەری ژمارەیەك لە بانكەكان ڕایگەیاند، خانەنشینان چینێكی گرنگی كۆمەڵگان هەرچی لە دەستمان بێت بۆ خزمەتكردنیان درێغی ناكەین و لە ئایندەدا خزمەتگوزاری زیاتریان پێشكەش دەكەین.
لەسەرەتای ئەم ساڵەوە بەبڕیاری وەزیری دارایی و ئابووری و بەهاوكاری بانكی ناوەندی هەرێم لە سلێمانی، بانكی مەڵكەندی ٥ نووسینگەی لەناو شاری سلێمانی بۆ دابەشكردنی مووچەی خانەنشینان كردۆتەوە و بڕیاریشە بەچەند قۆناغێك كارتی ئەلكترۆنی مووچە بۆ سەرجەم خانەنشینانی شارستانی و سەربازی دروست بكرێت.
