هەرێم و عێراق ڕێككەوتنیان لەسەر پرسی بودجە و هەناردەكردنەوەی نەوت واژۆ كرد و وەزارەتی كارەبای هەرێم دەڵێت: “پێدانی كارەبا زیاد دەبێتەوە”.
وەزارەتی كارەبای هەرێم لە ڕاگەیەنراوێكدا ئاماژەی بەوەكردووە، بە جێبەجێکردنی ڕێککەوتنی نێوان هەردوو حکومەتی هەرێم و فیدڕاڵ بۆ دەستپێکردنەوەی هەناردەی نەوتی هەرێم، 330 مێگاوات کارەبا بۆ ناو تۆڕی نیشتمانی دەگەڕێتەوە.
ڕاشیگەیاندووە، بە هۆی ڕاگرتنی بەرهەمهێنانی نەوت لە هەردوو کێڵگەی نەوتی گەرمیان و خۆرمەڵە، پێدانی كارەبا کەم بووەتەوە.
ئەمڕۆ سێ شەممە لە بەغدا، بە ئامادەبوونی هەردوو سەرۆك وەزیرانی هەرێم و فیدڕاڵ (مەسرور بارزانی و محەمەد شیاع سودانی) ڕێككەوتنی دەستپێكردنەوەی هەناردەی نەوتی هەرێم لەڕێگەی سۆمۆوە و بە نرخی فەرمی عێراق واژۆ كرا و بەپێی ڕێككەوتنەكە، داهاتی نەوتی هەرێم دەچێتەوە هەژمارێكی تایبەتی و لەژێر چاودێری سەرۆك وەزیرانی عێراق دەگەڕێنرێتەوە بۆ هەرێم و تەنها سەرۆك وەزیرانی هەرێم دەسەڵاتی ڕاكێشانی پارەكەی هەیە.
