ئەمڕۆ هەینی، بەسم ئەلعەوادی، وتەبێژی حكومەتی عێراق ڕایگەیاند، ڕەشنووسی یاسای بودجە ڕادەستی پەرلەمان دەكرێت.
وتەبێژی حكومەتی عێراق لە بەیاننامەیەكدا ڕایگەیاندووە، بۆ جێبەجێکردنی بڕگەکانی دەستوور و یاسای بەڕێوەبردنی دارایی فیدراڵی، ئێوارەی دوێنێ پێنج شەممە، ڕەشنووسی یاسای بودجەی فیدڕاڵی کۆماری عێراق بۆ ساڵانی دارایی ٢٠٢٣ و ٢٠٢٤ و ٢٠٢٥ بە فەرمی ڕادەستی پەرلەمان کرا.
ئاماژەی بەوەشكردووە، ڕەشنووسی یاسای بودجە، بە ماددە و بڕگە نوێیەکانی، کە بۆ یەکەمجار پەسەند کران، توانای ئاسانکاری هەیە بۆ جێبەجێکردنی پڕۆژە و پلان و بەرنامەکانی جێبەجێکردن و گەشەپێدان و دابینکردنی ژێرخانی و خزمەتگوزاری بۆ هاووڵاتیان.
هەفتەی پێشوو، ئەنجوومەنی وەزیرانی عێراق ڕێككەوتنی هەولێر و بەغدای لەسەر پڕۆژە یاسای بودجە ڕێگەیاند و پەسەندی كرد و بڕیاریدا ڕەوانەی پەرلەمانی بكات بۆ دەنگدان لەسەری، كە بودجەی سێ ساڵی لەخۆگرتووە.
