مزگەوتی گەورەی ئادیامان لە باكووری كوردستان كە تەمەنی پێنج سەدەبوو لە بوومەلەرزەكاندا بەتەواوی داڕووخا.
پارێزگای ئادیامان یەكێكە لەو پارێزگایانەی بوومەلەرزەكان زیانێكی زۆریان پێگەیاندووە، شوێنەوارە كولتووری و مێژووییەكانی شارەكەش بەهۆی بوومەلەرزەكانەوە زیانی زۆریان بەركەوتووە.
مزگەوتی گەورەی ئادیامان كە مێژووی دروستكردنی دەگەڕێتەوە بۆ سەدەی ١٦، بەهۆی بوومەلەرزەكەوە بەتەواوی داڕووخاوە و تەنها دیواری باكوور و رۆژئاوای مزگەوتەكە ماون.
مزگەوتی موسالا كە مێژووی دروستكردنی دەگەڕێتەوە بۆ سەدەی ١٧ یان ١٨ و خاوەنی تەلارسازییەكی تایبەتە، مزگەوتی كاب مێژووەكەی دەگەڕێتەوە بۆ سەدەی ١٨ زیانیان بەركەوتووە.
هەروەها خانی تووز، لە سەرەتاكانی سەدەی ١٩دا و مزگەوتی چارشی لە ساڵی ١٥٥٧دا و مزگەوتی سەرای كۆن لە سەدەی ١٨ و مزگەوتی یەنیپنار لە ساڵی ١٧٢٠دا دروست كراون، بەهۆی بوومەلەرزەكەوە زیانی زۆریان بەركەوتووە.
مەحموود ساریكایا، یەكێكە لە كاسبكارانی بازاڕی مێژوویی ئادیامان و تەمەنی ٦٠ ساڵە باسی لەوە كرد، مزگەوتی گەورەی ئادیامان یەكێك بووە لە پڕشكۆترین شوێنەكانی شارەكە و لەپاڵ زیانەكانی بوومەلەرزەكەدا خەمێكی زۆریان بۆ خاپووربوونی مزگەوتەكە خواردووە، “مزگەوتی گەورە، گرنگترین مزگەوتی شارەكە بوو. منیش زۆرم نوێژ تیادا كردووە. نزیكەی ٢٠ ساڵ بەر لە ئێستا نۆژەن كرایەوە و لە دوای ئەو نۆژەنكردنەوەیە زۆر جوان بوو، بەڵام بەداخەوە لە بوومەلەرزەكەی ئەمساڵدا داڕووخا. هەموو نزاكان لە مزگەوتی گەورە دەكران، مەولودی تیا دەخوێندرایەوە و جەژنەكانی تیادا پیرۆز دەكرا. لە كاتی نوێژی بەیانیشدا كاسبكارانی دەوروبەر لێرە كۆدەبوونەوە و نزایان دەكرد”.
دەشڵێت “لە دەوڵەتەكەمان چاوەڕێ دەكەین دووبارە مزگەوتی گەورە بنیاتبنێتەوە، دەمانەوێت مزگەوتەكە شكۆی جارانی بەدەستبهێنێتەوە”.
