كتێبی تۆ دەریامی كە بەسەرهات و ئاوازەكانی هونەرمەند عەزیز شاڕۆخی لەخۆگرتووە بە سەرپەرشتی مەهدی بایزیدی و نووسینی سارا محەمەدیان نووسراوە، بڵاوكرایەوە.
مەهدی بایزیدی لەوبارەوە ڕایگەیاند، ئەو كتێبە نزیك بە 17 ساڵ لەمەوپێش لەلایەن دەزگەی ئاراسەوە لە هەرێمی كوردستان و لە ژمارەیەكی كەمدا لەچاپ درابوو، هەر بۆیە بڕیار درا كە بە هەندێك گۆڕانكارییەوە ئەو كتێبە دووبارە لەچاپ بدرێتەوە.
دەشڵێت: ئەو كتێبە بە چاودێری مامۆستا عەزیز شاڕۆخ ئاوڕی لەسەر درایەوە و دووبارە لە چاپدراو لە چاپی نوێیدا شێعر و ئاوازەكانی دوو ئەلبوومی دوایی ئەو هونەرمەندەی بە ناوەكانی مەهاباد و سكاڵا بۆ زیادكراوە.
ئەو كتێبە لە چوار بەشدا پێكهاتووە، بەشی یەكەم پێشەكییە و بەشی دووهەم بەسەرهاتی مامۆستا لە نووسینی خۆیەتی و بەشی سێهەم دەقی شێعر و ئاوازەكانی مامۆستایە و بەشی چوارەمیش ئەلبوومی وێنەیە.
بایزدی ڕاشیگەیاند: ئەو كتێبە لە 500 ژمارەدا و لەلایەن بڵاوگەی ڕۆژەوە لە سنە لە چاپ دراوە و لەلایەن ناوەندی كتێبی شنەوە لە سەقز ڕەوانەی بازاڕ كراوە.
