ئەمڕۆ فەرمانبەرانی بەڕێوەبەرایەتی پسوڵەی خۆراکی سلێمانی کارەکانیان ڕاگرت، داوا دەکەن مافەکانیان پێبدرێت.
بەپێی ڕێککەوتنێکی نێوان وەزارەتی بازرگانی و پیشەسازی حکومەتی هەرێمی کوردستان و وەزارەتی بازرگانی عێراق، ئەو بڕە پارەیەی بۆ سەبەتەی خۆراک و بەشە ئارد لە هاووڵاتیان وەردەگیرێت کە بڕەکەی (٤٥٠) دینارە بۆ هەر هاووڵاتییەک، بۆ پێداویستییەکان و پاداشتی فەرمانبەران لە كۆمپانیای گشتی بازرگانی خۆراك و كۆمپانیای گشتی دروستكراوی دانەوێڵە خەرجدەکرێت.
بەپێی وتەی فەرمانبەرانی بەڕێوەبەرایەتی پسوڵەی خۆراک، ئەو ڕێککەوتنە بەڕێوەبەرایەتییەکانی پسوڵەی خۆراک، چاودێری بازرگانی و کۆمپانیانی دابەشکردنی خۆراک دەگرێتەوە، بەڵام تا ئێستا دوو جار فەرمانبەرانی کۆمپانیای دابەشکردنی خۆراک ئەو پاداشتەیان وەرگرتووە، لەبەرامبەردا پسوڵەی خۆراک و چاودێری بازرگانی هیچ پاداشتێکیان وەرنەگرتووە.
فەرمانبەرانی بەڕێوەبەرایەتی پسوڵەی سلێمانی، ئەمە بە جیاوازی و مافخوران دەبینن، بۆیە لەمڕۆوە کارەکانیان ڕاگرتووە، داوا دەکەن ئەوانیش مافەکانیان پێبدرێت، تا مافەکانیان بەدەست نەهێنن دەست بە کارکردن ناکەنەوە.
