ئیرینا ڤێرشچوك جێگری سەرۆك وەزیرانی ئۆكرانیا ڕایدەگەیەنێت، ئۆكراینا نایەوێت ژیانی هاووڵاتیانی بكەوێتە مەترسییەوە، بۆیە داوا لە هەموو هاووڵاتیانی شاری باخمووت دەكات بەزووترین كات شارەكە چۆڵبكەن.
ڤێرشچۆك ڕایگەیاند”وێڕای ئەو شەڕ و پێكدادانە سەختەی لە ناوچەكەدا هەیە، هێشتا 6 هەزار هاووڵاتی لە شارەكە ماونەتەوە”، ئەمەش لە كاتێكدایە بەهۆی شەڕ و پێكدادان و بۆردوومانی ڕووسیاوە بەردەوام هاووڵاتیان لەو ناوچەیە دەبنە قوربانی، ڤۆلۆدیمیر زێلینسكی سەرۆكی ئۆكرایناش ڕایگەیاندبوو، بارودۆخی جەنگ لە ناوچەكانی باخموت و سۆلیدار زۆر سەختە.
هەر لەو چوارچێوەیەدا، نوسینگەی نەتەوەیەكگرتووەكان بۆ هەماهەنگی و كاروباری مرۆیی لە ئۆكراینا بڵاویكردەوە”جەنگی بەردەوامی ڕووسیا و ئۆكراینا بارودۆخی هاووڵاتیانی لە ئۆكراینا خراپتركردووە و نزیكەی 18 ملیۆن كەس پێویستیان بە هاوكاری مرۆیی خێرایە”.
