بەپێی ڕاپۆرتە كەشناسییەكان، شەپۆلێكی دیكەی بەفر و باران ناوچەكانی هەرێمی كوردستان دەگرێتەوە و ئەگەر بارینی بەفرێكی كەم لە سلێمانی هەیە.
ئاراس جەبار، شارەزای كەشناسی بۆ (خەڵك) ڕایگەیاند، سبەی چوار شەممە ١٥-٢-٢٠٢٣ ئاسمانی ھەرێم بەزۆری ساماڵ و پەڵە ھەور ئەبێت و لە ئەنجامی کاریگەری بارستەھەوای ساردی باکوری ناوچەکە و ھاتنی بڕێک ھەور لە ڕۆژئاوای عێراقەوە لەکاتەکانی ئێوارە ئاسمانی ناوچەکە بەزۆری دەگۆڕێت بۆ نیمچە ھەور.
ڕاشیگەیاند، لەکاتەکانی شەودا بۆ بەرەبەیانی پێنج شەممە ١٦-٢ لەناوچەکانی سونوری پارێزگای سلێمانی و کەرکوک و ئیدارەی ڕاپەڕین و پارێزگای ھەڵەبجە ئەگەری نمە باران بۆ بارانێکی مامناوەند ئەبێت لەگەڵ بارینی بەفر بەڕێژەی ١ تا ٣ سەنتیمەتر لەناوچە شاخاوییەکاندا.
وتیشی، “ئەگەر ھەیە لەسەنتەری شاری سلێمانیش پڕوشە بەفر ببارێت و پلەکانی گەرما سبەینێ بەڕێژەی ١ پلە نزم دەبنەوە”.
ئاماژەی بەوەشكرد، کاریگەری ئەم شەپۆلە لاوازە پێش نیوەڕۆی پێنج شەممە ١٦-٢-٢٠٢٣ کۆتایی پێدێت.
