لیۆنێل مێسی ئەستێرەی ئەرجەنتینی و هێرشبەری پاریس سان جێرمان، داوا دەكات كۆمەك و یارمەتی بگەیەنرێتە قوربانیانی بومەلەرزەكەی توركیا و سوریا.
مێسی لەڕێی ئەنیستاگرامەوە بڵاویكردەوە:”ئەم ڕۆژگارانە زۆر خەمناكن بۆ هەزاران منداڵ و خانەوادەكانیان كە بەهۆی بومەلەرزەكەی توركیا و سوریاوە زیانیان پێگەیشتووە”.
بە وتەی مێسی:”دڵم لەگەڵتانە، بۆیە ڕێكخراوی نەتەوە یەكگرتووەكان بۆ منداڵان (UNICEF) لە سەرەتاوە كاریی كردووە بۆ پارێزگاری لە منداڵان”.
مێسی لە كۆتایی نوسینەكەیدا،بە گوزارشتی :”هاوكارییەكەت زۆر بەنرخە” هەوادارانی هانداوە یارمەتی منداڵان و زیانلێكەوتوان بدەن و لینكێكی بۆ ئەوانەش داناوە كە دەیانەوێت یارمەتی و هاوكارییەكان بگەیەنن.
نوسینەكەی مێسی كارێلێكێكی فراوانی لەنێو هەوادارانیدا لێكەوتۆتەوە و زیاتر لە 1.5 ملیۆن لایكی بۆ هاتووە لەدوای كاتژمێرێك لە بڵاوكردنەوەی.
مێسی چووە پاڵ هەڵمەتێك كە لەلایەن میریح دیمیراڵی توركی و بەرگریكاریی ئەتڵانتاوە ڕێكخراوە و ئامانج لێی كۆكردنەوەی یارمەتی و هاوكارییە بۆ زیانلێكەوتوانی بومەلەرزەكە.
پێشتر میدیاكانی توركیا بڵاویانكردەوە، مێسی لەڕێی ڕێكخراوە خێرخوازییەكەی، بڕی 3.5 ملیۆن یورۆی وەك هاوكاری بۆ قوربانیانی بومەلەرزەكەی توركیا وسوریا ڕەوانەكردووە كە بۆ مەبەستی چارەسەركردنی بریندارەكان و دروستكردنەوەی ئەو ماڵانەی وێران بوون، بەكاردەهێنرێت.
