وەزارەتی دارایی عێراق فەرمانی كرد بەبانكەكان، كە بەنرخی فەرمی حكومەت كە (دۆلارێك بەرامبەر 1300 دینارە) مامەڵە بە دۆلار بكەن.
وەزارەتی دارایی عێراق لە بەیاننامەیەكدا ئاماژەی بەوەكردووە، بۆ جێبەجێكردنی بڕیارەكانی ئەنجومەنی وەزیران، كە لە ٧/٢/٢٠٢٣ دەركرا سەبارەت بە پەسەندكردنی نرخی دراوی بیانی (دۆلار) و بۆ بەدواداچوونی توند لەلایەن وەزیری دارایی، تەیف سامی، ئەمڕۆ چوار شەممە، ٨/ ٢٠٢٠. 2/2023، وەزارەت ڕێنمایی داوە بە بانكی ڕافیدەین و ڕەشید بۆ كارپێكردن بە نرخی نوێی ئاڵوگۆڕی دۆلار بەرامبەر بە دیناری عێراقی.
لە ڕاگەیەنراوەكەدا ئاماژە بەوەشكراوە، “بانكی ڕافیدەین و ڕەشید ڕێكارەكانی بۆ فرۆشتنی دۆلار لە بنكەكانی ناو فڕۆكەخانەی نێودەوڵەتی بەغدا دەستپێكردووە بە نرخی (1320) دینار بۆ هەر دۆلارێك بە هاووڵاتیان و گەشتیاران”.
ڕاشیگەیاندووە، “بە مەبەستی بەرزكردنەوەی بەهای دراوی ناوخۆیی بەرامبەر بە دۆلار لەڕێگەی ئاسانكاری ڕێكارەكان و گەیشتن بە سەقامگیری لە نرخی ئاڵوگۆڕدا، ئەم ڕێكارە ڕاگەیەنراوە بۆ ڕزگاربوون لە بارگرانی هاووڵاتی بە هاوتەریب لەگەڵ پلانی حكومەت”.
جەختیشی كردۆتەوە، وەزارەتی دارایی و بانكی ناوەندی بۆ كەمكردنەوەی نرخی ئاڵوگۆڕ بەم شێوەیەی خوارەوە دۆلار دەفرۆشێت:
(1300) دینار بۆ هەر دۆلارێك، نرخی كڕینی دۆلارێك لە وەزارەتی دارایی.
(1310) دینار بۆ هەر دۆلارێك، نرخی فرۆشتنی دۆلار بە بانكەكان لە ڕێگەی پلاتفۆرمی ئەلیكترۆنیەوە.
(1320) دینار بۆ هەر دۆلارێك، نرخی فرۆشتنی دۆلار لە بانك و دامەزراوە داراییە نابانكییەكانەوە بۆ سوودمەندی كۆتایی.
وەزارەتی دارایی ڕوونیشی كردۆتەوە، “ئەم هەنگاوە دەكەوێتە چوارچێوەی پلانەكانی جێبەجێكردنی پڕۆگرامی وەزارەت و سیاسەتە كێشراوەكەی بەرامبەر بە پەرەپێدانی كەرتی بانكی و دارایی لە عێراقدا”.
