نوێترین ئامارەكانی قوربانیانی بوومەلەرزەكەی باكوور و ڕۆژئاوای كوردستان بڵاوكرانەوە، بەپێی ئامارەكان5894 كەس لە باكووری كوردستان و توركیا گیانیان لەدەستداوە، 34 هەزار و 810 كەسیش بریندار بوون.
بەپێی ئامارەكان، لە ڕۆژئاوای كوردستان و سووریاش 2500 كەس گیانیان لەدەستداوە و هەزارانی دیكەش بریندارن.
پڕۆسەی گەڕان و ڕزگاركردنی لێقەوماوان لە باكوور و ڕۆژئاوای كوردستان، توركیا و سووریا بەردەوامە.
توركیا ماوەی هەفتەیەك ماتەمینی گشتی لە وڵاتەكە ڕاگەیاندووەو باری نائاساییشی لە شارە كارەساتباربووەكان ڕاگەیاند، سووپاش لەو شارانە بڵاوەی پێكراوە، 2500 سەرباز گەیشتنە ناوچە كارەساتباربووەكان.
نزیكەی هەزار و 500 باڵەخانە لە ڕۆژئاوای كوردستان و سووریا ڕووخاون یان زیانیان پێگەیشتووە، لە باكووری كوردستان و توركیاش زیاتر لە شەش هەزار باڵەخانە ڕووخاونـ بەتایبەت لە هاتای و مەڕەش.
435 بوومەلەرزە لە ماوەی دوو ڕۆژی ڕابردوو لەشاری مەڕەشی باكووری كوردستان ڕوویانداوە.
600 تەرم لە مەڕەشی باكووری كوردستان دوێنێ دوای ناسینەوەیان بەخاكسپێردران.
لە 36 دەوڵەتەوە تیمی فریاگوزاری گەیشتنە توركیا و 70 دەوڵەتیش ئامادەی هاریكاری توركیایان ڕاگەیاند.
پەتا پەیتا فڕۆكەی سەربازی و مەدەنی لە فڕۆكەخانەكانی باكووری كوردستان دەنیشنەوە، بەشێكیان لە فڕۆكەخانەكانی ئیستەنبوڵ و ئەنقەرە و شارەكانی دیكەی توركیاوە دەچن، بەشێكیان لە وڵاتانەوە دەچن، ئەوان هاوكاری و تیمی فریاگوزاری دەگەیەننە باكووری كوردستان بۆ هاوكاریكردن بە لە بەهاناوەچوونی لێقەوماوان.
