وەزارەتی خوێندنی باڵا و توێژینەوەی زانستی هەرێم بڕیاریدا بە كەم كردنەوەی كۆنمرەی وەرگرتن لە زانكۆ و پەیمانگا ئەهلییەكان.
بەڕێوەبەرایەتی خوێندنی تایبەت لە وەزارەتی خوێندنی باڵای هەرێم لە گشتاندنێكدا بۆ سەرجەم زانكۆ و پەیمانگا تایبەتەكان، كە ئەمڕۆ 20-11-2022 دەرچووە ئاماژەی بەوەكردووە، بە نووسراوی ئەنجوومەنی وەزیران تایبەت بە كەم كردنەوەی كۆنمرەی وەرگرتن لە زانكۆ و پەیمانگا تایبەتەكان تەنها بۆ ساڵی خوێندنی 2022- 2023 دەبێت.
وەك لە گشتاندنەكەدا هاتووە، كۆنمرەی وەرگرتن لە پزیشكی ددان كەمكراوەتەوە بۆ 86 نمرە و لە دەرمانسازی 82 نمرە و لە ئەندازیاری تەلارسازی بۆ 77 نمرە لە ئەندازیاری شارستانی 76 نمرە و ئەندازیارییەكانی دیكە 5 نمرە كەمكرایەوە.
هەر بەپێی گشتاندنەكە، كۆنمرەی وەرگرتن لە كۆلێژی یاسا كەمكراوەتەوە بۆ 61 نمرە و ئامادەیی پیشەیی و پەیمانگای 5 ساڵە و 2 ساڵە 5 نمرە كەمدەكرێتەوە و هەروەها سەرجەم بەشە زانستی و زانستە مرۆڤایەتییەكان 2 نمرە كەمدەكرێنەوە.
