لە مانگی یەكەمی ساڵی ٢٠٢٣دا لانی كەم سزای سێدارەی ١٨ بەندكراوی كورد لە بەندیخانەكانی ئێران جێبەجێكراوەـ كە دەكاتە ٣٠٪ی هەموو ئەو بەندكراوانەی لە هەموو ئێراندا لەو مانگەدا لە سێدارە دراون.
بە پشتبەستن بە ئاماری تۆماركراو لە ناوەندی ئامار و بەڵگەنامەكانی ڕێكخراوی مافی مرۆڤی هەنگاو، لە ماوەی مانگی كانوونی دووەمی ٢٠٢٣دا لانی كەم ١٨ بەندكراوی كورد لە بەندیخانەكانی ئێران لە سێدارەدراون، كە دەكاتە یەك لەسەر سێی ئەو بەندكراوە كوردانەی ساڵی ٢٠٢٢ لە ئێراندا لە سێدارە دراون.
هەنگاو پێشتر ڕایگەیاندبوو، لە ساڵی ڕابردوودا سزای ٥٢ بەندكراوی كورد لە بەندیخانەكانی ئێران جێبەجێ كراوە.
لە مانگی ڕابردوودا لە هەموو ئێراندا ٦٠ بەندكراو لە سێدارەدراون، بە بەراورد لەگەڵ ئاماری بەندكراوانی كورد دەردەكەوێت، ٣٠٪ی كۆی ئەو بەندكراوانەی لە هەموو ئێراندا لە سێدارە دراون، بەندكراوی كورد بوون.
لەو ماوەیەدا سزای محەممەد مەهدی كەرەمی بەندكراوی سیاسی كورد و خەڵكی بیجاڕ كە لە ڕاپەڕینی شاری كەرەج دەستبەسەر كرابوو، لە بەندیخانەی ناوەندیی كەرەج جێبەجێكرا.
بەپێی ئەو ئامارە، ١٢ بەندكراوی كورد لە بەندیخانەكانی دەرەوەی كوردستان وەكوو كەرەج، ئەراك و بەندەر عەباس لە سێدارە دراون.
بە پشتبەستن بە ئامارەكان، سزای سێدارەی یەك كەس لەو بەندكراوانە لە سەرچاوە حكومەتییەكان ئاماژەی پێكراوە و ٣٠ حاڵەتی دیكە لە میدیا حكومەتییەكان باسی لێ نەكراوە.
جۆری سزاكان
بەندكراوانی سیاسی: ١ حاڵەت، دەكاتە ٥.٥٪ كۆی حاڵەتەكان.
كوشتنی ئەنقەست: ٥ حاڵەت، دەكاتە ٢٨٪ی كۆی حاڵەتەكان.
تاوانەكانی پەیوەندیدار بە ماددە هۆشبەرەكان: ١٢ حاڵەت، دەكاتە ٦٦.٥٪ی كۆی حاڵەتەكان.
شوێنی جێبەجێكرانی سزای سێدارە
بەندیخانەی ناوەندیی كەرەج: ٨ حاڵەت
بەندیخانەی ناوەندیی كرماشان: ٢ حاڵەت
بەندیخانەی ناوەندیی سەڵماس: ٢ حاڵەت
بەندیخانەی ناوەندیی ئەراك: ٣ حاڵەت
بەندیخانەی ناوەندیی بەندەر عەباس: ١ حاڵەت
بەندیخانەی ناوەندیی ئیلام: ١ حاڵەت
بەندیخانەی ناوەندیی ماكۆ: ١ حاڵەت
