ڕووداوێكی هاتووچۆ لەناو گەڕەكی موفتی لە هەولێر زیانێكی زۆری لێ كەوتەوە و بەهۆیەوە 3 ئۆتۆمبێل و چەند درەختێك ززیانیان بەركەوت و كەسێكیش بریندار بوو.
فازڵ حاجی، وتەبێژی هاتووچۆی هەولێر بۆ (خەڵك) ڕایگەیاند، لەوانەیە كەس بڕوانەكات، كە ئەم ڕووداوە لەشەقامێكی قەرەباڵغی ناو گەڕەك كەوتبێتەوە.
ڕوونیشی كردەوە، لە كاتژمێر1ی پاش نیوەڕۆی دوێنێ، لەناو گەڕەكی موفتی ئۆتۆمبێلێكی نیسانی تایبەت بەخێراییەكی زۆرەوە دەهات و لەدەرەنجامیش كۆنتڕۆڵی لەدەستدا و چووە سەر ناوبڕی شەقام و چەند دارێكی جوانكاری شكاند و دواتریش پەڕییەوە دیوەكەی تری شەقام و خۆی كێشا بە دوو ئۆتۆمبێلی تر، ئینجا وەستا.
ڕاشیگەیاند، لەدەرەنجامی ڕووداوەكە كەسێك بریندار بوو، زیانیش بەر 3 ئۆتۆمبێل كەوت، لەگەڵ دارەكانی جوانكاری.
وتەبێژی هاتووچۆ دەپرسێت، “ئایا دەكرێت لێخوڕین لەجووتسایدێكی ناو گەڕەك بەو خێراییە بێت؟ بەتەنها شكاندنی ئەو دارە گەورانە و لێبونەوەی ئەكسلی ئۆتۆمبێلەكە بەتەنیا بەسە بۆئەوەی پێمان بڵێت لێخوڕینەكە چۆن بووە”.
