دەزگای ئاسایشی نیشتمانی عێراق ڕایدەگەیەنێت، لە ژمارەیەك پارێزگای ناوەڕاست و خواروی عێراق دەستیان بەسەر زیاتر لە 500 هەزار لیتر نەوتی سپی قاچاخدا گرتوە و 29 تۆمەتباریشیان دەستگیركردوە.
دەزگای ئاسایشی نیشتمانی ئەمڕۆ هەینی 27ی 1ی 2023 لە راگەیەندراوێكدا بڵاوكردووەتەوە، بە پشتبەستن بە ڕێنماییەكانی فەرماندەی گشتی هێزە چەكدارەكان و لە درێژەی ئەو زنجیرە ئۆپەراسیۆنانەی كە لەلایەن دەزگای ئاسایشی نیشتمانییەوە ئەنجامدراون، لەپارێزگاكانی (بەغدا، نەجەف، كەركوك، نەینەوا، قادسیە، دیالە، و بابل) مەفرەزەكان دەستیان بەسەر زیاتر لە 500 هەزار لیتر نەوتی قاچاخدا گرت.
قاچاخچیەكان مەبەستیان بووە ئەو نەوتە بەشێوەی قاچاخ لەناوچە جیاجیاكان بگوازنەوە و پاشانیش بیفرۆشنە هاووڵاتیان، بۆئەو مەبەستەش ژمارەیەك كۆگای تایبەتیان ئامادەكردبوو .
