پەرلەمانتارێكی هاوپەیمانی دەوڵەتی یاسا ڕایدەگەیەنێت، نرخی 100 دۆلار لە 145 هەزار دیناردا جێگیر دەبێت، ئاماژە بە كاری لیژنەكەی سودانیش دەكات كە لەئێستادا دەستیكردووە بە چارەسەركردنی كاروبارەكانی ناوخۆ و لە ماوەكانی داهاتووشدا ڕوو لە كاروبارە دەرەكییەكان دەكات.
باقر سەعدی، پەرلەمانتاری هاوپەیمانی دەوڵەتی یاسا لە لێدوانێكی ڕۆژنامەوانیدا ڕایگەیاند:”محەمەد شیاع سودانی لیژنەیەكی تایبەتی بۆ چارەسەكردنی تەنگژەی دابەزینی بەهای دیناری عیراقی بەرامبەر بە دۆلار پێكهێناوە، لیژنەكەش دەستیكردووە بە چارەسەركردنی كاروبارەكانی ناوخۆ لەڕێی لەسەركارلابردنی پارێزگاریی بانكی ناوەندی”.
بە وتەی سەعدی:”نرخی دۆلار لە 145 هەزار دینار بۆ هەر 100 دۆلارێك جێگیر دەبێت لەماوەی داهاتوو، لەڕێی ئەو رٍِێكارانەی بۆ چارەسەركردنی كێشەكە گیراونەتەبەر، لیژنەكەی سودانی بەردەوام دەبێت لەكارەكانی لەسەر ئاستی دەرەكی و ڕێڕەوە دیپلۆماسییەكان دەگرێتەبەر بۆ جێگیركردنی نرخی دۆلار”.
ئەو پەرلەمانتارەی دەوڵەتی یاسا دەڵێت:”ئەو ڕێكارانەی گیراونەتەبەر لەگەڵ لەسەركارلابردنەكان، بونەتە مایەی دابەزينی بەردەوامی دۆلار و لەماوەی چەند ڕۆژی داهاتووشدا نرخی دراوەكە زیاتر دادەبەزێت”.
لە ماوەی ئەم چەند ڕۆژەی دواییدا نرخی دۆلار لەبەرامبەر دیناری عیراقی بەرزبوونەوەیەكی بێ پێشینەی بەخۆوەبینی و نرخی 100 دۆلار 165 هەزار دیناری تێپەڕاند.
