
نیوەڕۆی ئەمڕۆ پێنجشەممە، شێخ تەمیم بن حەمەد ئال سانی، میری قەتەر، وەک یەکەمین سەرکردەی عەرەب گەیشتە دیمەشق.
سەرۆکایەتیی کۆماری سووریا لە ڕاگەیەندراوێکدا بڵاوی کردەوە، ئەمڕۆ پێنجشەممە، ئەحمەد شەرع، سەرۆکی ئیدارەی نوێی کۆماری سووریا، لەگەڵ میری قەتەر کۆ دەبێتەوە.
ڕۆژی 16ـی کانوونی دووەمی 2025، شێخ محەمەد بن عەبدولڕەحمان ئال سانی، سەرۆک وەزیرانی قەتەر و وەزیری دەرەوەی قەتەر، لە دیمەشق لەگەڵ ئەحمەد شەرع کۆ بووەوە.
شێخ محەمەد بن عەبدولڕەحمان وتی: وڵاتەکەی لە یەکەم ڕۆژی ڕووخانی ڕژێمی بەشار ئەسەدەوە هەوڵەکانی بۆ هەڵگرتنی سزاکانی سەر سووریا دەدات.
ئاماژەی بەوەش کرد، وڵاتەکەی، ئۆپەراسیۆنەکانی ئیسرائیل بۆ دەستدرێژیکردنە سەر ناوچە پارێزراوەکان لە سووریا ڕەت دەکاتەوە.