دڵشاد عومەر، بەڕێوەبەری گشتیی پەروەردەی سلێمانی، دوای پێنج مانگ لە ڕاگەیاندنی دەستلەکارکێشانەوەی، دوو ڕۆژە گەڕاوەتە سەر کارەکەی و لە ژووری خۆی دەوام دەکات.
دڵشاد عومەر، مانگی تەمموزی ساڵی رابردوو رایگەیاند، بەهۆی ئەوەی بەبێ ڕەزامەندی من زەوییەکی 182 دۆنمی لە بەکرەجۆ دراوە بە کۆمپانیایەیەک بۆ پرۆژەی وەبەرهێنان، دەست لەکار دەکێشمەوە و دواتر لە ڕۆژی 19ـی ئاب نامەی دەستلەکارکێشانەوەی بڵاوکردەوە و دەستی لەکار هەڵگرت.
سەرچاوەیەک لە پەروەردەی سلێمانی پەیوەندی بە (زووم)ەوە کرد و وتی، مامۆستا دڵشاد گەڕاوەتەوە بۆسەر کارەکەی.
كەناڵەكە لە زاری پەیامنێرەكەیەوە لە سلێمانی پشتڕاستی كردەوە، كە بەڵێ مامۆستا دڵشاد گەڕاوەتەوە سەر كارەكەی و لەسەر کورسی بەڕێوەبەری گشتی دانیشتووە.
سەبارەت بە گەڕانەوە بۆ دەوام سەرباری دەستلەكاركێشانەوەی؟ دڵشاد عومەر وتویەتی، “من ئەو ماوەیە مۆڵەت بووم، ئێستاش مۆڵەتەکەم تەواوبووە و گەڕاومەتەوە، دەمەوێ کاروباری خانەنشینی بکەم، چونکە من تەمەنم نەگەیشتووە بە خانەنشینی و دەمەوێت خۆم داوای خانەنشینی بکەم”.
سەبارەت بەوەی، ئەی ئێستا وەکو بەڕێوەبەری گشتی واژۆ لەسەر کتاب دەکەیت و کاروبارەکان ڕایی دەکەیت؟ دڵشاد عومەر وتی، “بەڵێ هەموو کارەکان دەکەم و بەڕێوەبەری گشتیم، بەڵام ئەو کێشەی لەسەری داوای دەستلەکارکێشانەوەم کرد، ئێستاش مکوڕم لەسەری، نابێ ئەو زەوییە بدرێ بە کۆمپانیا”.
