وەزیری دارایی و ئابووری هەرێمی کوردستان بڕیارێکی نوێی لە بارەی باجەوە دەرکرد و ڕایگەیاند، لە پێناو دەرفەتی خۆتۆمارکردن بڕیاریانداوە بە درێژکردنەوەی ماوەی خۆتۆمارکردنی کۆمپانیاکان.
بەپێی نووسراوێکی ئاوات شێخ جەناب، وەزیری دارایی و ئابووری حکومەتی هەرێمی کوردستان، تیایدا هاتووە: لە پێناو بەرژەوەندی گشتی و کارئاسانی بۆ باجدەران و پێدانی دەرفەتی خۆتۆمارکردن، بەمەبەستی خۆگونجاندن لەگەڵ سیستمی خود گونجاندن، کە سیستمێکی نوێیە و کەوتووەتە بواری جێبەجێکردن و پیادەکردنی بڕیاری ژمارە (102)ی ساڵی (2017)ی ئەنجومەنی وەزیران.
ئەوەش هاتووە، بڕیار درا بە درێژکردنەوەی ماوەی خۆتۆمارکردنی ئەو کۆمپانیایانەی کە تازە دامەزراون و نەیانتوانیوە سەردانی بەڕێوەبەرایەتییەکانی باج بکەن بەمەبەستی خۆتۆمارکردن و کردنەوەی دۆسییە بۆیان تا 30ی حوزەیرانی 2025، ئەمەش وەک هاندان و پێدانی دەرفەتێکی زیاترە بە کۆمپانیا تازەکان.
بەپێی نووسراوەکەی وەزیری دارایی هەرێم، لە دوای ئەو بەروارە کۆمانیا نابووردرێت لە سەپاندنی هەر سزایەکی یاسایی بەسەریدا، لە ئەنجامی کەمتەرخەمی و جێبەجێ نەکردنی ئەرکە یاساییەکان بەپێی یاساو ڕێنماییە کارپێکراوەکان.
