بە هۆی خەرجنەکردنی مووچەوە، دەوام لە زۆربەی خوێندنگەکانی سلێمانی ڕاگیراوە و مامۆستایان جەخت لە درێژەدان بە بایکۆت دەکەنەوە.
ئەمڕۆ دووشەممە، کە لە کۆتایی مانگی کانوونی دووەم نزیک دەبینەوە، هێشتا مووچەی مانگی کانوونی یەکەمی 2024 دابەش نەکراوە و چارەنووسی مووچەش لە سایەی ناکۆکییەکانی نێوان حکومەتی هەرێمی کوردستان و حکومەتی عێراق بە نادیاریی ماوەتەوە.
بە هۆی دابەشنەکردنی مووچەوە مامۆستایان بایکۆتیان ڕاگەیاندووە و ئەمڕۆش لە زۆربەی خوێندنگەکانی سنووری پارێزگەی سلێمانی ڕاگیرا.
دوێنێش مامۆستا ئاوات ئازاد، لە دەستەی داکۆکی لە مامۆستایان و فەرمانبەرانی ناڕازی ڕایگەیاند “سەربەرزی بۆ مامۆستایانی بوێر و خاوەن کەرامەت، ئەمڕۆ 80%ی خوێندنگەكان دوای پێدانەوەی ئەنجامی وەرزی یەکەم مامۆستایان بایکۆتی هۆڵەکانی خوێندنیان ڕاگەیاند و ناڕۆنەوە سەر کارەکانیان”.
ئاماژەی بەوەشكردووە، ئەمڕۆ مامۆستایان پەیمانی خۆیان دوپات کردوە و ڕایانگەیاند، ئەرک بەرامبەر مافە، بایکۆتی هۆڵەکانی خوێندنی وەرزی دووەم دەستی پێکردووە و مامۆستایان سەربەرزانە نەچوونەوە هۆڵەکانی خوێندن.
