بەڕێوەبەری گشتیی تەندروستیی هەڵەبجە ڕەتیکردەوە گرێەستی تاقیگە حکومییەکان بدرێتە کەرتی تایبەت و ڕەزامەندی لەسەر بڕیارەکە نەدا.
دكتۆر ئازاد مستەفا، بەڕێوەبەری گشتیی تەندروستیی هەڵەبجە، لە کۆنگرەیەکی ڕۆژنامەوانیدا ڕایگەیاند، زۆرینەی پشکنینەکان لە پارێزگای هەڵەبجە بە نرخێکی زۆر کەم بووە و ئێستا نرخەکان 10 هێندە زیادیانکردووە، و ئێمە ناچینە ژێر باری ئەو گرێبەستانەوە و نایدەینە ئەو کۆمپانیایانە.
ئاماژەی بەوەشدا، ئەو کۆمپانیایانەی پێشتر بە بێ بەرامبەر ئامێر و پیداویستی دابینکردووە و ئێستا ئامادەنین بیدەینە کۆمپانیایەک کە نرخەکەی دە هێندە زیاترە و بارگرانی بۆ خەڵک دروستبکەین.
وتیشی، بەفەرمی بۆچوونی خۆم و حزبەکەم ڕایدەگەیەنین كە ناچینە ژێر باری ئەو گرێبەستەی وەزارەتی تەندروستی كردوویەتی بۆ بەئەهلیكردنی تاقیگەی نەخۆشخانە حكومییەكان و ڕێگە بەوە نادەین.
ڕوونیشیکردەوە، ئەم گرێبەستە زیانی بۆ خەڵک هەیەو داوادەکەین وەزیری تەندروستی و لایەنی پەیوەندیدار هەمواری گرێبەستەکان بکەنەوە و پێداچوونەوەی بۆ بکرێت، هەرکات لە بەرژەوەندی هاووڵاتیان و داهاتی گشتی بوو ئەوکات پەیڕەوی دەکەین.
ئەمە لەکاتێکدایە، پێشتر وەزیری تەندروستی حکومەتی هەرێم ڕایگەیاند، ئەو گرێبەستانە هیچ بارگرانی و زیادەی نرخی تێدا نییە و بۆ گەڕاندنەوەی داهاتە بۆ خەزێنەی حکومەت، و هاووڵاتیان هەروەک پێشتر پارە دەدەن و هیچ زیادەیەکی لەسەر نییە.
