پ.د. سەعید عەلی
ئەوەی سەرنج بدات تێبینی دەکات کە هەندێک لە مامۆستایان و کەسانی ئەکادیمی و ئەوانەی تەمەنێکە سەرقاڵی زانستن لە زانکۆ و دامەزراوەو ناوەندە زانستیە جۆراوجۆرەکاندا، کاتێک بڕوانامە، یان نازناوی زانستیی، یان پلەی وەزیفیان بەرز دەبێتەوە، یان دەگەنە تەمەنێکی دیاریکراو ، ئیتر واز لە فێر بوون و خوێندنەوە و کتێب و زانست ئەهێنن و بەشتی لابەلاو لاوەکیەوە سەرقاڵ دەبن، هەندێ جار هەندێکیان تەنانەت خۆی ڕزگار دەکات لە کتێبخانەکەی بەوەی یان دەیفرۆشێ، یان دەیبەخشێتە کەسانی تر ! یان هەندێ جار بەیەکجاری واز دەهێنێ و تەنها خۆی بە عیبادەت و پەرستش و نوێژو ڕۆژوو گرتن و زۆر خوێندنەوەی قورئان سەرقاڵ دەکاو هیچی تر!!!
من دەڵێم :
لەڕاستیدا ئەمە ئەو پەڕی کەمتەرخەمی و هەڵەی گەورەیە !! لێرەدا پێویستە بەوردی و بەقووڵی بیر لە سەرەنجامی خراپی ئەم جۆرە بیرکردنەوەو مامەڵەیە بکرێتەوە، هەروەها ئەم جۆرە تێڕوانین و بیرکردنەوەیە ڕاست بکرێتەوە !!
چونکە لەڕاستیدا سەرقاڵ بوون بەوەرگرتنی ( زانستی بەسوود ) بەکۆی ڕای زانایان گەورەترین عیبادەت و پەرستش و پیرۆزترین ڕێگەی خوا لەخۆ ڕازیکردنە!
پشت هەڵکردن لە زانست و مەعریفەو کتێب و خوێندنەوە بۆ ( کەسانی قاڵ بوو و پێشتر لێبڕاو بۆ ئەو بواره ) تەنهاو تەنها بە بیانووی خۆسەرقاڵ کردن بە نوێژو ڕۆژوو و پەرستشەوە فێڵێکە لە شەیتانەوە و هەڵخلیسکان و ڕێ لێ تێکچوونە !!
خۆ ئەگەر سست بوون و وازلێهێنانەکە تەنها لەپێناو ڕووکردنە خۆشی و لەزەت و حەزو ئارەزووە دنیایی و بەرژەوەندیە ماددیە ڕوتە تایبەتەکان بێ، ئەوا کارەساتەکە، ماڵوێرانیەکە، سەرلێشێواویەکە، گەورەترو بێ وێنە ترە.!!
