سەرۆكی پارتی سۆسیال دیموكراتی كوردستان ڕایدەگەیەنێت، حەزدەکەم لە جێگادا نەمرم و لە پێناو گەل و نیشتمانەکەمان شەهید ببم و دەشڵێت: یەكێتی و پارتی یان دەبێ ڕێکبكەون یان دەبێ بیکەن بەدوو ئیدارە.
محەمەد حاجی مەحمود، سەرۆكی پارتی سۆسیال دیموكراتی كوردستان بۆ میدیای حزبەكەی لە چاوپێكەوتنێكدا ڕایگەیاند، هەر گەل و نەتەوەیەك ئازاد نەبێت مردووە، بۆیە ئایا مردوویەكی نیوەگیان باشە یان مردنێك تاكو هەتا هەتایە مێژوو باست بكات، بۆیە من لەگەڵ ئەو مردنەم، كە لەپێناوی گەل و خاك و نیشتمان گیانی خۆی بەخت بكات، بۆیە من حەز دەكەم لەسەر جێگە نەمرم، بەڵكو لەپێناو خاك و گەلی خۆما گولەیەك بمكوژێت.
ڕاشیگەیاند، كەس هێندەی سودانی دژی كورد نییە، با خەڵك وانەزانێت، كە دێت و پێدەكەنێ ئەوە باشە لەگەڵ كورد، تەنانەت لە هەولێر پێموت، كە لەو كاتەی تۆ سەرۆكایەتی عێراق دەكەیت دادگا زۆرترین بڕیاری دژی هەرێم داوە و سودانی هاتووە بە یاسا و بە هێمنی كاردەكات تەنانەت نەوتی هەرێمی لە پاریسەوە ڕاگرت و سەرچاوەی داهات و قوتی خەڵكی كوردستانی ڕاگرت و پەرلەمان و كۆمسیۆنی كوردستانیان هەڵوەشاندەوە.
ئاماژەی بەوەشكرد، ئایا ئەوە حاڵە ماوەی دوو ساڵە بە بەردەوامی بودجە و مووچەی هەرێم بووە بە مانشێت و هەواڵی میدیاكان، لە كاتێكدا بودجە و مووچە بابەتێكی سیاسیە و بە دەستی سودانیە، بەڵام ڕاگەیاندن وایان لێكرد، كە بە دەست ئەو ژنەیە “تەیف سامی” كە ڕەنگە دراوسێكی خۆشی نەیناسیبێت، كە ئێستا هەموو دونیا دەیناسێت.
دەشڵێت: ئەو هەموو چوونە بۆ بەغدا بۆ بودجە و مووچە شەرمەزارییە، ئەمە دانووستان نییە، ئەمە تەسلیم بوونە.
ئاماژەی بەوەشكرد، هەر میللەتێك سەربەخۆ نەبێت مردنی باشترە لە مانی، ئێستا هەموو شتێك تەسلیمی بەغدا كراوە و هەموو ڕۆژێك بەڕێگەی بەغداوەن و كراوە بە ڕێگەی كانی، بۆ ئێستا ئێمە زەلیلی دەستی تر بین؟ بۆیە ئێستا كوڕ هەیە باوكی خۆی قبوڵ نیە و لە ماڵ دەریدەكات، ئێمە بۆ میلەتێكی تر قبوڵ بكەین؟ كەواتە بۆ نەمرین لەپێناوی میللەتەكەی خۆمان؟
محەمەد حاجی مەحمود وتیشی، “دەبێت یەكێتی و پارتی ڕێكبكەون و حكومەت دروست بكەن یان دەبێت بیكەن بە دوو ئیدارە، كە بڕواناكەم بیكەن بە دوو ئیدارە، چونكە هیچیان سوودی لێ نابینن و شەریكن لە هەموو شتێكدا”.
جەختیشی كردەوە، دوای هەموو هەڵبژاردنێك ئەبێت چاوەرێی یەكێتی و پارتی بكەین بزانین چۆن پۆستەكان دابەش دەكەن، لە 1992ەوە هەڵبژاردن دەكەین هەر هیلاكی بووە و سوودی نەبووە، چونكە هەر دەبێت چاوەڕێی ئەوان بكەین تا پۆستەكان بەش دەكەن و هەر پرستەكان لای ئەوان دەبن و تەنها هەندێك دەموچاو دەگۆڕێن.
