سەرۆکی ئەمریکا لەبارەی ناسنامەی بارمتەکان زانیاری ئاشکرا دەکات و دەڵێت”ئەمریکییان تێدایە”.
جۆ بایدن، سەرۆکی ئەمریکا، ڕۆژێک پێش کۆتاییهاتنی ماوەی سەرۆکایەتییەکەی، لەبارەی ئاڵوگۆڕی دیل و ڕاگەیاندنی ئاگربەست لە غەزە، بۆ میدیاکان دوا و ڕایگەیاند، لە نێو ئەو زیندانیانەی کە بڕیارە لە غەززە ئازاد بکرێن، ئەمریکییەکان تێدایە، و ئەو ڕێککەوتنەی لە غەززە کە ئەمڕۆ جێبەجێ دەکرێت، هەمان ئەو پێشنیازەیە کە لە مانگی ئایاری ڕابردوودا خستمانەڕوو.
ئاماژەی بەوەشدا، ڕاگەیاندنی ئاگربەست ئەنجامێکی باشی ئەو سیاسەتە بەرهەمدار و کاریگەرەیە کە چەند مانگێکە جێبەجێمان کردووە، و ئەمڕۆ بەرهەمەکەی دەردەکەوێت.
بایدن ڕاشیگەیاند، وەک دەستپێکی راگەیاندنی ئاگربەست و ئاڵۆگۆری دیلەکان، هەر ئەمڕۆ نزیکەی 700 بارهەڵگری هاوکاری دەچنە ناو کەرتی غەززە.
ڕۆژی 15ـی کانوونی دووەمی 2025، ڕێککەوتنێک لە نێوان حەماس و ئیسرائیل واژۆکرا، بۆ ڕاگرتنی شەڕ لە کەرتی غەززە و ئاڵوگۆڕی دیل و بارمتە، ئەوەش دوای نێوەندگیری هاوبەش بە سەرۆکایەتی ویلایەتە یەکگرتووەکانی ئەمریکا و قەتەر و میسر.
