شارەزایەكی بواری كەشناسی ڕایدەگەیەنێت، شەپۆلێكی بەفر و باران هەرێمی كوردستان دەگرێتەوە و پلەكانی گەرما بۆ ژێر سفر پلەی سەدی دادەبەزێت و دەشڵێت: لەناو شارەكانی سلێمانی و هەڵەبجە بەفر دەبارێت.
هەڤاڵ سەدیق گەڵۆزی، شارەزای بواری كەشناسی بڵاویكردۆتەوە: “پێشبینی دەكرێت ڕۆژی یەك شەممە لەسەر دوو شەممە لەنێوان 19 بۆ 20ی ئەم مانگە لە درەنگانی شەو كەشێكی ناسەقامگیر بەشێكی زۆر لە ناوچە جیاوازەكانی هەرێمی كوردستان بگرێتەوە.”
ئاماژەی بەوەشداوە: “شەپۆلێكی بەفر و بارانی لاواز بۆ مامناوەند لەسەر نەخشە بەدیار كەوتووە و ڕوو لە هەرێمی كوردستان دەكات، بەهۆی هاتنی بڕێك شێی دیاریكرا و دروستبوونی هەوری مامناوەند لە ناوچه دەشتاییەكانی هەولێر، كەركوك، گەرمیان نمەباران بۆ بارانی مامناوەند دەیانگرێتەوە و لەناوچە شاخاوییەكانی هەولێر، دهۆك، سۆران، ڕاپەڕین، سلێمانی، هەڵەبجە و بەشێك لە ناوچە شاخاوییەكانی گەرمیان بەهۆی هاتنی بارستە هەوایەكی ساردی جەمسەری، كە لەناوچەكانی ڕۆژهەڵاتی كوردستان و باكووری كوردستان داخڵ بەفربارین لەم ناوچانە بە چڕی دەستپێدەكات و لەوانەیە كاریگەریی بارستە هەواساردەكە زیاتر شۆڕبێتەوە بۆ ئەم ناوچانەی كە بەرزییان لەنێوان 800 تا 1000 مەتر كەمترە.”
روونیشی كردووەتەوە: “ئەگەری هەیە، لە سەنتەری پارێزگای سلێمانی و هەڵەبجە بەفر ببارێت، ئەگەر شەپۆلەكە بەجێگری بمێنێتەوە و گۆڕانكاری ڕوونەدات.”
