شاندی دانووستاندنكاری ئیسڕائیل و حەمماس لە دەوحە ڕێككەوتن لەسەر ئاگربەست و سبەینێ پێنج شەممە ئاگربەستەكە بە فەرمی ڕادەگەیەنرێت.
ماڵپەڕی (ئەكسیۆس) لە زاری بەرپرسێكی ئیسڕائیلییەوە بڵاویكردەوە، كە هەردوو شاندی دانووستاندنكاری ئیسڕائیلی و حەمماس ڕێكككەوتوون و ڕەنگە سبەینێ ڕێككەوتنەكە ڕابگەیەنرێت.
ئاشكراشی كردووە، محەمەد سنوار، سەرۆکی حەمماس-ی فەلەستینی ڕەزامەندی لەسەر ڕێککەوتنەکە داوە.
لای خۆشیەوە، ئاژانسی (فرانس پرێس) بڵاویكردۆتەوە، حەمماس ڕێککەوتنی ئاگربەستی لە غەززە پەسەندکرد و بە نێوەندگیریەكانی وتووە، بە ئاگربەست و گۆڕینەوەی بارمتەكان ڕازییە.
هاوكات، میدیاكانی ئیسڕائیل بەشێكی ڕێككەوتنەكەیان بڵاوكردەوە و ئاماژەیان بەوەكردووە، كە لە ڕێككەوتنەكەدا هاتووە: لە ڕۆژی یەكەمدا 3 بارمەتە ئازاد دەكرێت و لە ڕۆژی حەوتەم 4 بارمتە و لە ڕۆژی 14هەمدا 3 بارمتەی دیكە ئازاد دەكرێن.
ئەوەش ئاشكراكراوە، كە بنیامین نەتەنیاهو، ئێوارەی ئەمڕۆ لەگەڵ ئەندامانی شاندنی دانوستاندنكاری وڵاتەكەی، كە لە دەوحە-ن گفتوگۆ دەكات دەربارەی ڕێككەوتنەكە.
