قائیمقامیەتی قەزای چەمچەماڵ نرخی گۆشتی دیاریكرد و بەپێی بڕیارەكە نرخەكەی بەڕێژەیەكی بەرچاو دابەزیوە.
قائیمقامیەتی قەزای چەمچەماڵ لە ڕاگەیەنراوێكدا ئاماژەی بەوەكردووە، لە سبەینێوە نرخی گۆشت دادەبەزێنرێت و نرخی یەك كیلۆ گۆشتی گوێرەكە بە ئێسكەوە (14 هەزار) و گۆشتی نەرمە بە (16 هەزار) دینار دەبێت.
ڕاشیگەیاندووە، گۆشتی بەرخ دەبێتە 18 هەزار دینار و گۆشتی كاوڕ 14 هەزار دینار و گۆشتی مەڕ 12 هەزار دینار دەبێت.
جەختیشی كردۆتەوە، هاووڵاتیان لەکاتی بینینی هەر سەرپێچی و گرانفرۆشیەک دەتوانن لیژنە هاوبەشەکانی قائیمقامیەتی قەزای چەمچەماڵ بە ژمارە تەلەفۆنی (07718343040) ئاگادار بكەنەوە.
ئەمە لەكاتێكدایە، كە پێشتر نرخی گۆشتی گوێرەكە تا 18 هەزار و گۆشتی مەڕ و بەرخ تاوەكو 22 هەزار دینار گران بووبوو.
