وتەبێژی وەزارەتی ئەوقافی هەرێم تێچووی حەجی ئەمساڵ ئاشكرادەكات و دەڵێت: بەراورد بە ساڵی ڕابردوو 650 هەزار دینار بەرزبۆتەوە.
لە 25-09-2024، تیروپشک بۆ ئەو ناوانە کرا، کە ساڵی 2017 و 2023 ناوی خۆیان تۆمار کردبوو و لە تیروپشکەکەدا 5 هەزار و 120 کەس ناویان بۆ حەجی ئەمساڵ دەرچووە.
نەبەز ئیسماعیل، وتەبێژی وەزارەتی ئەوقافی هەرێم بە (خەڵك)ی ڕاگەیاند، تێچووی حەجی ساڵی 2025 لەلایەن حکومەتی عێراقەوە دیاریکراوە، کە بۆ هەر کەسێک 7 ملیۆن دینار دەبێت، كە ساڵی ڕابردوو 6 ملیۆن و 350 هەزار دینار بووە.
سەبارەت بە گران بوونی نرخەكە وتی، “بەهۆی بەرزبوونەوەی نرخی هۆتێل و هەموو پێداویستییەکانی دیکەی مانەوەیە لە سعودیە”.
پشکی حەجی حاجییانی عێراق و هەرێمی كوردستان بۆ ساڵی 2025 بەراورد بە ساڵی 2024 زیادکراوە، كە ساڵی ڕابردوو 4,174 کەس ناویان دەرچووبوو، بەڵام بۆ ئەمساڵ زیادكراوە بۆ 5,120 كەس.
