وەزیری کشتوکاڵ ڕایگەیاند بەمەبەستی چارەسەرکردنی کێشەی ساغکردنەوەی بەرهەمی هێلکەی کێڵگەکانی هەرێمی کوردستان لە ناوەڕاست و باشووری عێراق، نووسراو ئاڕاستەی ئەنجومەنی وەزیران دەکات.
بێگەرد تاڵەبانی، وەزیری کشتوکاڵ ڕایگەیاند، ئەمڕۆ سێ شەممە، بە ئامادەبوونی بریکاری وەزارەت و ڕاوێژکار و بەرێوەبەرانی گشتی و ستافی نوسینگەمان لەگەڵ نوێنەرانی خاوەنی پڕۆژەکانی پەلەوەری بەرهەمهێنانی هێلکەی خواردن کۆبووینەوە، بۆ مەبەستی لەنزیکەوە گوێگرتن و تاوتوێکردنی کێشە و داواکاریەکانیان، تایبەت بە بابەتی گواستنەوە و ساغکردنەوەی بەرهەمەکانیان لە بازاڕەکانی ناوەڕاست و خوارووی عێراق.
ڕوونیشیکردەوە کە بەچەند هۆکارێک و بریارێکی وەزارەتی کشتوکاڵی عێراق، کێشە بۆ بەبازاڕکردنی بەرهەمەکانیان دروستبووە لە شارەکانی تری عێراقدا.
بێگەرد تاڵەبانی ڕایگەیاند وێرای جەختکردنەوە لەسەر پاراستنی بەرژەوەندی خاوەن پڕۆژەکان و پارێزگاری لە بەرهەمی خۆماڵی هێلکەی خواردن و پاڵپشتیکردنی خاوەن پڕۆژەکان، بەڵێنماندا
کە ڕاستەوخۆ بەدواداچوون بۆ کێشە و داواکاریەکانیان بکەین و بە نووسراوێک ڕوونکردنەوەی تەواو ئاڕاستەی ئەنجومەنی وەزیرانی هەرێمی کوردستان بکەین، تاوەکو لەسەر ئاستی ئەنجومەنی وەزیران گفتوگۆی لەبارەیەوە بکرێت، بۆ مەبەستی چارەسەرکردنی کێشەکەیان لەگەڵ هەریەک لە ئەنجومەنی وەزیرانی حکومەتی فیدراڵ و ئەنجومەنی وەزاری ئابووری و وەزارەتی کشتوکاڵی عێراق، لە چوارچێوەی مامەڵەکردنی بەرهەمە ناوخۆییەکانی هەرێمی کوردستان وەک بەشێکی سەرەکی لە بەرهەمی ناوخۆی سەرتاسەری عێراقدا.
