حاكم قادر حەمەجان لە كۆبوونەوەی لەگەڵ وەرزشكارە دێرینەكانی سلێمانی ڕایگەیاند، ئەوەی كردوومانە ئەرك بووە و هەرچیمان بۆ سلێمانی كردبێت منەتی تێدا نییە و وتیشی، “مووچە مافێكی ڕەوا و یاساییە و ناكرێت مووچە و قوتی ھاووڵاتیان تێكەڵ بە ململانێ سیاسیەكان بكرێت”.
حاكم قادر حەمەجان، سەردانی كۆمەڵەی وەرزشكارە دێرینەكانی سلێمانی كرد و ڕایگەیاند، شاری سلێمانی هەمیشە لە سەرجەم بوارەكانی كەلتوری و هونەری و ئەدەبی و مۆسیقا و ئازادی ژنان و خەبات و بەرگری ڕۆڵی گرنگ و بەرچاوی بینیوە.
وتیشی، وەرزشكارە دێرینەكان خزمەتێكی گەورەیان بە سەرجەم بوارە وەرزشیەكان كردوە و توانیویانە چەندین نەوە پێبگەیەنن، سەرەڕای ھەڵوێستی نیشتمانی و جوامێریشیان، خاوەنی چەندین شەھیدن لە بزوتنەوەی كوردایەتیدا.
وەرزشكارە دێرینەكان سوپاسی حاكم قادریان كرد، كە لە سەردەمێكدا ئەو سەرۆكی شارەوانی بووە، زەویان پێدراوە و زەویشی بۆ یانە وەرزشیەكان و یاریگای بچوك لە گەڕەكەكاندا تەرخانكردووە و هەوڵەكانیان بەرزنرخاند، لەبەرامبەریشدا حاكم قادر وتی، “ئەوەی كردوومانە ئەرك بووە و هەرچیمان بۆ سلێمانی كردبێت منەتی تێدا نییە”.
لەبارەی مووچەی فەرمانبەرانی ھەرێمیش حاكم قادر وتی، “پێویستە حكومەتی هەرێم ھەموو ڕێگایەكی یاسایی بگرێتەبەر بۆ دابینكردنی مووچەی ئەمساڵی فەرمانبەران و مامۆستا و خانەنشینان، چونكە مووچە مافێكی ڕەوا و یاسایی خۆیانە و ناكرێت مووچە و قوتی ھاوڵاتیان تێكەڵ بە ململانێ سیاسیەكان بكرێت”.
حاكم قادر تیشكیشی خستە سەر پێكهێنانی كابینەی نوێی حكومەتی هەرێم و ڕایگەیاند، پێویستە لەسەر لایەنە سیاسیەكانی هەرێمی كوردستان پەلە بكەن لە پێكهاتنی حكومەت بۆ ئەوەی ھەرێم نەكەوێتە بۆشایی یاساییەوە، دەشبێت بنەمای پێكھێنانی حكومەتەكە خزمەتكردنی زیاتری خەڵك بێت و ھاوسەنگی ھێزی تێدا پارێزراوبێت.
حاكم قادر جەختیشیكردەوە، دونیا و ڕۆژهەڵاتی ناوەڕاست و ناوچە بەرەو گۆڕانكاری خێرا دەڕۆن، بۆیە پێویستە بە بەرنامەیەكی ستراتیژێكی نیشتمانی و نەتەوەی ڕوونەوە خۆمان ئامادەبكەین بۆ ھەر ئەگەر و ڕووداو و ئالنگاری و پێشھاتێك، چونكە تەنها ئەوە دەتوانێت گەلەكەمان لەم باهۆزی گۆڕانكارییانەدا بگەیەنێتە كەناری ئارامی.
