پارێزگاری هەولێر ژماری گەشتیارانی پارێزگاكە لە ڕۆژانی پشووی سەری ساڵ ئاشكرادەكات و دەڵێت: 26 ڕووداوی هاتووچۆ تۆماركراوە و 135 حاڵەت و تاوانی جۆراوجۆر ئەنجام دراوە.
ئومێد خۆشناو، پارێزگاری هەولێر لە کۆنگرەیەکی ڕۆژنامەوانیدا ڕایگەیاند، لە ماوەی شەش ڕۆژی پشووەکانی سەری ساڵ 63 هەزار و 411 گەشتیار سەردانی پارێزگای هەولێریان کردووە.
ڕاشیگەیاند، بەهۆی پابەندنەبوون بە یاساکان و خێرا لێخوڕین 26 ڕووداوی هاتووچۆ ڕوویانداوە، کە بەهۆیانەوە یەک کەس گیانی لەدەستدا و 14 کەسی دیکەش برینداربوون.
ڕوونیشی كردەوە، هەر لە پشووەکانی سەری ساڵ 135 حاڵەت و تاوانی جۆراوجۆر ئەنجامدراون، 129 حاڵەت و تاوان ئاشکراکراون و تاوانباران و ئەنجامدران دەستگیر کراون و 6 تاوانیش لەژێر لێکۆلینەوەدان.
بە وتەی ئومێد خۆشناو، “لەو ماوەیە 16,100 نەخۆش سەردانی نەخۆشخانە گشتییەکانی سنووری پارێزگای هەولێریان کردووە، 225 نەشتەرگەری گەورە و 533 نەشتەری بچووک ئەنجامدراون”.
