بەبۆنەی ساڵیادی دامەزراندنی سوپای عێراقەوە ڕۆژی دوو شەممە 6ی كانوونی دووەم (6-1-2025) لە تەواوی عێراق كرا بە پشوو، بەڵام تا ئێستا حكومەتی هەرێم هیچ بڕیارێكی نەداوە.
لە شەشی کانونی دووەمی ساڵی (1921)دا سوپای عێراق لە سەر دەستی کۆمەڵێک ئەفسەری ئازادیخواز و نیشتیمانی پلەبەرزی ئەو سەردەمە، کە زۆربەیان کورد بوون و بە دەسپێشخەریی جەعفەر عەسکەری، کە کوردی خەڵکی کەرکوک بوو دروستبوو.
لەوساوە لە سەردەمی پاشایەتییەوە تا ئەمڕۆ هەموو ساڵێک لە (6)ی کانونی دووەمدا لە سەرتاسەری عیراق و سەرەرای جیاوازیی لە سستەم و شێوازی حکومرانیی ئەو یادە هەر دەکرێتەوە.
ئەمیندارێتی گشتی ئەنجوومەنی وەزیرانی عێراق بڵاویكردەوە، بە بڕیاری محەمەد شیاع سودانی، سەرۆك وەزیران ڕۆژی دوو شەممە 6ی كانوونی دووەم لە سەرجەم دامەزراوەكان و فەرمانگەكان بەبۆنەی ساڵیادی دامەزراندنی سوپای عێراقەوە دەكرێتە پشووی فەرمی.
هەرچەندە تا ئێستا حكومەتی هەرێم لە ماڵپەڕی فەرمی خۆی خشتەی پشووەكانی ساڵی 2025ی بڵاونەكردۆتەوە، هاوكات هیچ بڕیارێك و ڕاگەیەنراوێكی دەربارەی ئەو پشووە بڵاونەكردۆتەوە و یەكلایی نەكردۆتەوە، هەرچەندە بەشێكی پێشمەرگە و چەند لیوایەك سەر بە سوپای عێراقن و بەشێك لە فەرمانگە فیدڕاڵییەكانی هەرێم سەر بە حكومەتی فیدڕاڵین.
