لە ماوەی هێرشەکانی ئیسرائیل بۆ سەر کەرتی غەززە، لە میانی دوو هەفتەی ڕابردوودا 490 فەڵەستینی کوژراون و هەزار و 283 کەسی دیکە بریندار بوون.
وەزارەتی تەندروستی فەڵەستین لە کەرتی غەززە لە ڕاگەیاندراوێکدا، باسی لەوەکردووە: لە ماوەی 24 کاتژمێری ڕابردوودا، بە هۆی هێرشی سوپای ئیسرائیل بۆسەر غەززە 59 کەس کوژراون و 273 کەسی دیکەش برینداربوون.
وەزارەتەکە ئەوەشی وتووە: لە ماوەی دوو هەفتەی ڕابردوودا بە هۆی هێرشەکانی ئیسرائیل بۆ سەر کەرتی غەززە، 490 فەڵەستینی کوژراون و هەزار و 283 کەسی دیکە بریندار بوون.
ئەوەش خراوەتەڕوو، ژمارەی ئەو فەڵەستینییانەی کە تا ئێستا لە ئاکامی ھێرشەکانی ئیسرائیل بۆسەر غەززە کوژراون، بەرزبووەتەوە بۆ 45 ھەزار و 717 کەس و ژمارەی بریندارانیش گەیشتووەتە 108 ھەزار و 856 کەس.
وەزارەتی تەندروستی فەڵەستین لە کەرتی غەززە لە ڕاگەیاندراوەکەدا جەختی لەوەش کردووەتەوە کە بەشێک لە تەرمەکان لە ژێر داروپەردووی ڕووخاوی باڵەخانەکاندا ماونەتەوە و بە هۆی ڕێگرییەکانی سوپای ئیسرائیل دەستپێڕاگەیشتن پێیان ئەستەم بووە.
