بەڕێوەبەرایەتی گشتی کارەبای سلێمانی نرخی ئەمپێری کارەبای مۆلیدە ئەهلییەکانی بۆ مانگی 12 ڕاگەیاند و ئاشکرایکرد، ئەمپێرێک مۆلیدە لە نێوان 14 هەزار بۆ 15 هەزار دینارە.
بەپێی ڕاگەیەندراوی بەڕێوەبەرایەتی گشتی کارەبای سلێمانی تیایدا هاتووە: ئه‌مڕۆ شە‌ممه لیژنەی دیاریكردنی نرخی مۆلیده ئه‌هلییه‌كان کۆبووەوە و به‌پێی نرخی سوته‌مه‌نی له بازاڕه‌كاندا نرخی هه‌ر كاتژمێرێك کارەبای مۆلیدە بۆ یه‌ك ئه‌مپێر 43 دینارە، به‌مه‌ش نرخی یه‌ك ئه‌مپێر كاره‌بای مۆلیده‌ی ئه‌هلی گه‌ڕه‌كه‌كان له ناوشاری سلێمانی له‌نێوان 14 بۆ 15 هەزار دیناره، بەو پێیەى مۆلیدەکان لە نێوان (335 بۆ 350) کاتژمێر کاریان کردووە، به‌هۆی جیاوازی كارکردنیان نرخی ئه‌مپێرێك له گه‌ڕه‌كێك بۆ گه‌ڕه‌كێكی دیكه جیاواز ده‌بێت.
باسی لەوەشکردووە: سەبارەت بە ئەو مۆلیدانەی کە بەرنامەی کارکردنیان لەسەر داوای هاووڵاتیان لە شوێنەکانی تر زیاترە و لە حەوتی بەیانی بۆ یەکی شەو کاردەکەن نرخی ئەمپێرێک لە نێوان 18بۆ 19 هەزار دینارە.
لە بارەی کارکردنی مۆلیدەکان لە یەکەم مانگی ساڵی نوێدا، کارەبای سلێمانی دەڵێت، خشته‌ی كارپێكردنی مۆلیده بۆ مانگى كانوونی_دووەم دەگۆڕدرێت و بەمشێوەیە دەبێت:
رۆژانە لەکاتژمێر 12:00ی نیوەڕۆ تا 1:00ی شەو کاردەکەن.
کاتژمێر 1:00ی شەو دەکوژێتەوە تا 6:30ی بەیانی.
کاتژمێر 6:30ی بەیانی تا 8:00ی بەیانی کاردەکەن.
بۆ ئەم مانگە رۆژانی هەینی و شەممەش مۆلیدەکان بەیانیان کاردەکەن.
بەرنامەکەش لە سبەینێ یەکشەممەوە جێبەجێ دەکرێت.
لیژنه‌ی دیاریكردنی نرخی مۆلیده ئه‌هلییه‌كان، جه‌ختیان له‌وه‌كردوه‌ته‌وه كه له‌كاتی كوژاندنه‌وه‌ی كاره‌بای نیشتیمانی نابێت كارپێكردنی مۆلیده و پێدانی كاره‌با به هاووڵاتیان له پێنج خوله‌ك زیاتر بخایه‌نێت، به‌پێچه‌وانه‌وه خاوه‌ن مۆلیده‌كه سزاده‌درێت.
