كەشناسی هەرێم ئاشكرای دەكات، كە شەپۆلێکی باران بارین هەندێک لە ناوچەکانی ڕۆژهەڵاتی عێراق و هەرێم دەگرێتەوە و شارەزایەكی كەشناسی دەڵێت: ” ئەگەر زۆرە لافاو لە چەم و دۆڵەکان دروست ببێت”.
بەڕێوەبەرایەتی گشتی کەشناسی و بوومەلەرزەزانی هەرێمی کوردستان لە ڕاگەیەنراوێكدا ئاماژەی بەوەشكردووە، ئەمڕۆ شەممە شەپۆلێکی باران بارین هەندێک لە ناوچەکانی ڕۆژهەڵاتی عێراق و هەرێم دەگرێتەوە، لە ئەنجامی کاریگەری ئەم شەپۆلە ئاسمانی هەرێم هەوری تەواو دەبێت لەگەڵ ئەگەری دەستپێکردنی بارینی نمە باران لە کاتەکانی نێوەڕۆدا لە ناوچەکانی گەرمیان و کەرکووک و هەڵەبجە.
ڕاشیگەیاندووە، لە کاتەکانی ئێوارە و شەودا شەپۆلی باران بارینەکە درێژ دەبێتەوە و پارێزگای سلێمانیش دەگرێتەوە و پێشبینیش دەکرێ لە شەودا ڕێژەیەکی زیاتر باران لەو ناوچانە ببارێ.
لای خۆشیەوە، سیروان ساڵح، شارەزای كەشناسی بۆ (خەڵك) ڕایگەیاند، ئەمڕۆ شەممە و بە درێژایی ئەمشەو تا بەیانی یەک شەممە ئەگەری بارانی زستانەی زۆرباش هەیە بۆ تەواوی ناوچەکانی گەرمیان، ئەگەر هەیە لە نێوان ( 15 تا 30 ملم باران ببارێت) و لە زنجیرە چیاکانی خۆرهەڵات وەک داڵەهۆ و باکووریش و بەمۆ و زمناکۆ و زەردە و سەگرمە و قەرەداغ بەفر ببارێت.
ڕووونیشی كردەوە، له شەپۆلەکانی ڕابردوودا زەوی بەتەواوی پاراو بووە، لەم شەپۆلەشدا هێندەی تر زەوی دەبوژێتەوە و ئەگەر زۆرە لافاو لە چەم و دۆڵەکان دروست ببێت، جگە لەوەش بیر و کانیاوەنیش دەبوژێنەوە.
وتیشی، “ئەوەی زیاتر دڵخۆشمان ئەکات ئەوەیە له ناوچەکانی باشووری گەرمیانیش بڕی بارانەکەی باشتر و زیاتر دەبێت و لەو ناوچانەش بارودۆخی ڕووپۆشی ڕووەکی و ئاو و کشتوکاڵ زۆر باشتر دەبێت”.
