بە هەوڵی 50 ئەفسەر و کارمەندی بەرگریی شارستانی سۆران و کەسانی خۆبەخش، ئەمشەو تەرمی شاخەوانەکە لە چیای زۆزک هێنرایە خوارەوە.
ئەمشەو بەڕێوەبەرایەتی بەرگری شارستانی سۆران ڕایگەیاند، دوای ئەوەی کاتژمێر 2:45 خولەکی پاش نیوەڕۆی ئەمڕۆ ئاگادارکرانەوە لە هەڵدێرانی هاووڵاتییەک لە چیای زۆزک، 10 تیم دەرچون بۆ شوێنی ڕووداوەکە.
ڕوونیشیکردەوە کە بەهۆی سەختی شاخەکە و نەبوونی ڕێگای ئۆتۆمبێل ناچار تیمەکانیان بەپیادە ڕەوی بەڕێکەوتن و کاتێک گەیشتنە شوێنی ڕووداوەکە، دەرکەوت هاووڵاتییەژە بەهۆی سەختی برینەکەیەوە گیانی لەدەستداوە و “هەرچەند لەلایەن تیمەکانمان هەوڵێکی زۆر درا و فریاگوزاری سەرەتایی بۆ ئەنجام درا بەڵام بێسوود بوو”.
لە ڕاگەیەندراوەکەدا هاتووە، “دواتر تیمەکانمان دەستیان کرد بە گواستنەوەی تەرمەکە بۆ خوارەوەی شاخ بۆ سەر شەقامی سەرەکی، ڕێگایەکی پڕ مەترسی و سەخت بوو چەند کاتژمێرێکی خایاند تا توانیمان تەرمەکە بهێنینە خوارەوە و دواتر ڕەوانەی پزیشکی دادی سۆران کرا بۆ توێکاری پزیشکی”.
بەرگریی شارستانی سۆران ئەوەشی خستەڕوو نزیکەی 50 ئەفسەر و کارمەند و چەند هاووڵاتییەکی خۆبەخش بەشداریان لە هێنانەوەی تەرمی ئەو هاووڵاتییەدا کرد کە دانیشتووی سۆرانە و بەمەبەستی شاخەوانی لەگەڵ دوو هاوڕێیدا چووبوونە شاخەکە.
