ئەمڕۆ چوار شەممە 1-1-2025، بانکی ناوەندی عێراق ڕاگرتنی میکانیزمەکانی پلاتفۆرمی ئەلیکترۆنی پەیوەست بە فرۆشتنی دۆلاری ڕاگەیاند، بەڵام میکانیزمی پێدانی دۆلار بە گەشتیاران لە فڕۆکەخانەکان بەردەوام دەبێت.
عەممار خەلەف، جێگری پارێزگاری بانکی ناوەندی بۆ ئاژانسی هەواڵی (العراقیە) ڕایگەیاند، “میکانیزمی کارکردن لەسەر پلاتفۆرمی ئەلیکترۆنی پەیوەست بە گواستنەوەی دەرەکی ڕاگیرا، بەڵام پارەدارکردنی بازرگانی دەرەکی لە ڕێگەی بانکە پەیوەندیدارەکانەوە بەردەوامە بەپێی میکانیزمی جیاواز، کە هاوتەریبن لەگەڵ ئەوەی لە وڵاتانی جیهاندا کاری پێدەکرێت”.
ئاماژەی بەوەشکرد، “بەردەوام دەبێت لە پێدانی دۆلار بە گەشتیاران لە فڕۆکەخانەکان بەپێی میکانیزمی پەسەندکراو، کە باشترینە لە سنووردارکردنی دەستڕاگەیشتن بە دۆلار لەلایەن گەشتیارانەوە”.
هاوكات، بانکی ناوەندی عێراق لە ڕاگەیەنراوێكدا ئاماژەی بەوەكردووە، دەستکەوتێکی گەورەی لە گواستنەوەی دەرەکیدا بەدەستهێناوە و بەردەوام دەبێت لە پەیڕەوکردنی شێوازە مۆدێرنەکان لە بەڕێوەبردنی سیاسەتی دراو لە عێراقدا.
ڕاشیگەیاندووە، “بانکەکە سەرکەوتوو بووە لە پابەندبوون بە بەرنامەکەی پەیوەست بە گواستنەوەی دەرەکی لە ڕێگەی پلاتفۆرمی ئەلیکترۆنییەوە بۆ کاری بانکەکانی عێراق لە ڕێگەی بانکە دەرەکییەکانیانەوە و ئەم گواستنەوەیە لە قۆناغێکدا ڕوویدا، کە پڕۆسەکە پێیدا تێپەڕیبوو”.
جەختیشی كردۆتەوە، گواستنەوەی دەرەکی، بە پەنجەرەیەک بۆ کڕین و فرۆشتنی دراوی بیانی دەستیپێکرد و چووە قۆناغی پلاتفۆرمی ئەلیکترۆنی بۆ گواستنەوەی دەرەکی و کۆتایی هات بە پڕۆسەی بەهێزكردنی هاوسەنگی دراو لە ماوەی ساڵی ٢٠٢٤دا و لە هەفتەی کۆتایی ئەمساڵدا بە تەواوی بەدەست هات.
