زیاتر لە دوو ملیار دینار بۆ وەزارەتی خوێندنی باڵا و توێژینەوەی زانستی گەڕێندرایەوە کە بە هۆی گەندەڵییەوە نادیار بوو.
ئەمڕۆ سێشەممە، حەیدەر عەبودی، وتەبێژی ڕاگەیاندنی وەزارەتی خوێندنی باڵا و توێژینەوەی زانستی عێراق بە ڕۆژنامەی سەباحی ڕاگەیاند، لە چوارچێوەی جێبەجێکردنی بەرنامەی حکومەت بۆ بەرەنگاربوونەوەی گەندەڵی و پاراستنی ماڵی گشتی، توانراوە لە ماوەی دوو ساڵدا دوو ملیار و 346 ملیۆن دینار بۆ خەزێنەی گشتی بگەڕێندرێتەوە.
ڕوونیشیکردەوە کە پارەکان لە ڕێی گرتنەبەری ڕێکاریی یاساییدا گەڕێندراونەتەوە و ئەویش لە چوارچێوەی ستراتیژی نیشتمانی بۆ دەستپاکی و دژە گەندەڵیدا دێت.
وتەبێژەکەی وەزارەتی خوێندنی باڵا هیچ ڕوونکردنەوەیەکی دەربارەی ئەو ڕێکارانە نەداوە کە بەرامبەر ئەو کەسانەی گەندەڵییەکان بەسەردا ساغ بووەتەوە، گیراونەتەبەر.
