فڕۆکەیەکی هێڵی ئاسمانی کۆریای باشوور بە دەیان سەرنشینیەوە لە فڕۆکەخانەی موان کەوتەخوارەوە کە دەکەوێتە باشووری وڵاتەکەوە.
ئەمڕۆ یەکشەممە، فڕۆکەیەکی هێڵی ئاسمانی کۆریای باشوور کە 175 سەرنشین و شەش تیمی فڕۆکەکەی هەڵگرتبوو، لە کاتی نیشتنەوەی لە فڕۆکەخانەی موان تێکشکا و بەپێی زانیارییە سەرەتاییەکان نزیکەی 100 کەس گیانیان لەدەستداوە.
جیونگ هون، بەڕێوەبەری ئاگرکوژێنەوەی موان لە کۆنفرانسێکی ڕۆژنامەوانیدا ڕایگەیاند، ڕووداوەکە بەهۆی خۆپێداکێشانی باڵندە و خراپیی کەشوهەوا دەگەڕێتەوە و دوای تەواوبوونی لێکۆڵینەوەش، بە وردی هۆکارەکەی ئاشکرا دەکرێت.
بە پێی ئەو دیمەنانەی لە کاتی ڕووداوەکەدا تۆمارکراون دەردەکەوێت کە فڕۆکەکە لە کاتی نیشتنەوەدا لە ڕێڕەوەکەی لادەدات و خۆی دەکێشیت بە دیوارێکی فڕۆکەخانەکەدا.
میدیای کۆریای باشوور بڵاویکردەوە، یەکەم هەوڵی نیشتنەوەی فڕۆکەکە شکستی هێناوە کە لە جۆری بۆینگ 737-800بووە و لە هەوڵی دووەمیشدا تێكشکاوە.
