بەهۆی سەرهەڵدانەوەی ناڕەزایی و خۆپیشاندانەكانەوە و چارەسەر نەكردنی كێشەكانی هاووڵاتیانی سنوورەكەی لەلایەن حكومەتی هەرێمەوە، قائیمقامی شارۆچكەی پێنجوێن دەستی لەكاركێشایەوە.
زانا ڕەحمان، قائیمقامی پێنجوێن لە ڕاگەیەنراوێكدا دەستلەكاركێشانەوەی خۆی لە پۆستەكەی ڕاگەیاند و ئاماژەی بەوەكرد، چەندین ساڵە لێپرسراوانی سەرووی خۆمان دەستەوسان بوون و نەیانتوانیوە ئاوڕێكی جدی لە سنوری قەزای پێنجوێن بدەنەوە و بودجە و خزمەتگوزاری پێویستی بۆ دابین بكەن.
دەقی ڕاگەیەنراوەكە:
بسم الله الرحمن الرحيم
(لَا يُكَلِّفُ اللَّهُ نَفْسًا إِلَّا وُسْعَهَا)
دەست بەرداربوون
ماوەی زیاتر لە (٨) هەشت ساڵە ئەمانەتی بەرپرسیارێتی پۆستی قائیمقامییەتی قەزای پێنجوێن لەسەر شانمە و نێوانی خۆم و خودای گەورە بۆ یەك ساتیش خیانەت و كەمتەرخەمیم لە كارەكەمدا نەكردووە و پۆستی قائیمقامییەتیم بۆ بەرژەوەندی تایبەتیم بەكارنەهێناوە. وە هەمیشە پاڵپشت و داكۆكیكاری مافەكانی هاووڵاتییانی خۆشەویستی قەزاكەم بووم و لەخۆشی و ناخۆشییاندا بەشدار بووم.
بەداخەوە چەندین ساڵە لێپرسراوانی سەرووی خۆمان دەستەوسان بوون و نەیانتوانیوە ئاوڕێكی جدی لە سنوری قەزای پێنجوێن بدەنەوە و بودجە و خزمەتگوزاری پێویستی بۆ دابین بكەن ئەمە سەرەڕای ئەوەی چەندین جار داواكاری پێنجوێنمان گەیاندووە پێیان.
زیاتر لە ماوەی سێ ڕۆژە بەشێكی زۆری هاووڵاتییانی خۆشەویستی قەزاكەم لەسەر جادەن و داوای چاككردنی بارودۆخی كارەبا دەكەن بەڵام تا ئێستا بێ وەڵام ماوینەتەوە و كێشەكەمان بۆ چارەسەر نەكراوە سەرەڕای ئەوەی دەیان جار لە دەرگای لایەنە پەیوەندیدارەكانمان داوە.
بۆیە وەك بەرپرسێك كە هەستی بەرپرسیارێتیم هەیە لەبەردەم خودای گەورە و ئەمانەتی بەرپرسیارێتیم لەسەر شانە بەرامبەر بە خەڵكی سنووری قەزای پێنجوێن دەست بەرداری پۆستی قائیمقامییەتی قەزای پێنجوێن دەبم وەك دەربڕینی ناڕەزایەتی و بەدەمەوە نەهاتن بۆ چارەسەركردنی كێشەكان و دابین نەكردنی خزمەتگوزارییەكانی سنووری قەزای پێنجوێن.
داوای لێبوردن لەخودای لێبووردە و میهرەبان و پاشان خەڵكی خۆشەویستی سنووری قەزای پێنجوێن دەكەم لە هەر كەموكورتییەك لە كاروبارمدا هەبووبێت.
لە كۆتاییدا زۆر سوپاسی هەموو ئەو بەڕێزانە دەكەم كە هاوكار و پاڵپشتم بوون بۆ باشتر ڕاپەڕاندنی كارەكانی قائیمقامییەتیم لە (دام و دەزگاكانی حكومی و مامۆستایانی ئایینی و لایەنی ئەمنی و لایەنە سیاسییەكان و كەسایەتییە خێرخوازەكان و فەرمانبەرانی قائیمقامییەت و ئەوەی ڕۆژێك لە ڕۆژان بەتەنها وشەیەكیش یارمەتیدەرم بووبێ بۆ باش بەرەوپێش چوون و سەركەوتنم) وە زۆر سوپاسی بزووتنەوەی گۆڕان و مەكۆی پێنجوێن دەكەم كە متمانەیان پێكردم و بەرپرسیارێتی پۆستی قائیمقامییەتی قەزای پێنجوێن یان بەمن سپارد.
جێی شانازی بوو بۆ من كە وەك پێنجوێنییەك ماوەی( ٨) هەشت ساڵ لەخزمەتی هاووڵاتییانی سنووری قەزاكەمدا بووم.
پێنجوێنی بوونم شانازییە بۆم و شانازی بە گەورە و بچووكی پێنجوێنییەكانەوە دەكەم.
رَبَّنا تَقَبَّلْ مِنَّا إِنَّكَ أَنْتَ السَّمِيعُ الْعَلِيمُ…
وَتُبْ عَلَيْنا إِنَّكَ أَنْتَ التَّوَّابُ الرَّحِيمُ…
زانا ڕەحمان ڕەحیم
قائیمقامی قەزای پێنجوێن
