ئالین هونەرمەندی رۆژئاوای كوردستان، رایگەیاند لە چەند ڕۆژی داهاتوودا بە بۆنەی هاتنی ساڵی نوێوە گۆرانییەك بە سریانی پێشكەش دەكات.
سەبارەت بە هۆكاری وتنی گۆرانی بە سریانی ناوبراو لە لێدوانێكدا وتی: هەموو پارچەكانی كوردستان شوێنی پێكەوەژیانی نێوان پێكهاتە ئایینی و نەتەوەییەكان بووە، هیچ كاتێك هەست بە جیاكاری نەكراوە، من لە ژینگەیەكدا گەورە بووم دۆستایەتی و هاوڕێیەتیم لەگەڵ كریستیانەكان هەبووە، هەر ئەوەش وایكرد كە بە سریانی گۆرانی بڵێم و شارەزایی لە زمانیان هەبێت.
وتیشی: بەبۆنەی سەری ساڵی نوێوە گۆرانی (حۆنلێ حۆنلێ) بە شێوازێكی نوێ و جیاواز پێشكەش بە خوشك و برا كریستیانەكان دەكەم، هیوادارم بە دڵیان بێت و لێرەوە پیرۆزبایی ساڵی نوێیان لێدەكەم، هیوادارم ساڵی نوێ بۆ هەموو لایەكمان ساڵی تەبایی و خۆشگوزەرانی بێت و هاتنە دیی هیوا و ئاواتەكانی گەلی كوردستان بێت لە هەموو پارچەكان.
ئالین وتی: هیوادارم گشت هێزە كوردستانییەكان لە هەموو پارچەكانی كوردستان گوتاریان یەك بخەن و یەكگرتوو بن بەتایبەتی كوردانی ڕۆژئاوا، چونكە ئەوان بە كاتێكی هەستیار وناسكدا تێپەڕ دەبن و باشترین چارەسەر بۆ گرفتەكانیان لە ئێستادا یەكگرتن و هاوكاری كردنی یەكترە، هیوای ئازادی و ئاوەدانی بۆ گشت پارچەكان دەخوازم.
تێكست و ئاوازی ئەم گۆرانییە خانمە هونەرمەند جۆلیانا جوندۆ دایناوە دابەشكردنی موزیك و ئەرانجمینت لەلایەن مەمۆ گول و دەرهێنەری بە توانا هەژار دهۆكی كاری دەرهێنانی كلیپەكەی ئەنجامداوە.
