دوای چەندین ساڵ لەخۆبەڕێوەبەری، کورد لە سووریا لەگەڵ گۆڕانی هاوسەنگی هێزی سیاسی و هێرشەکانی ئەنقەرەدا بەرەوڕووی ئاستەنگی نوێ دەبێتەوە، ئاڵنگارییەکانیش هەڕەشە لە دەستکەوتەکانیان دەکات.
لەڕاپۆرتێکدا، ماڵپەڕی دۆیچە وێللای ئەڵمانی ئاماژەی بەوەداوە، بەسوودمەندبوون لەپشتیوانی ئەمریکا لە شەڕی داعشدا، لەماوەی زیاتر لە دە ساڵی ململانێکان لە سووریا، کورد توانی دەسەلاتێکی خۆبەڕێوەبەری لەباکوور و باکووری ڕۆژهەڵاتی ئەو وڵاتە دابمەزرێنێت و لەوێدا کلتوور و میراتی خۆی زیندوو بکاتەوە، بەڵام لەگەڵ ڕووخانی ڕژێمی بەشار ئەسەد و گۆڕینی سەرکردایەتی لەدیمەشق، کورد ڕووبەڕووی قۆناغێکی نوێ دەبێتەوە.
هێرشەکانی تورکیا
لەکۆتایی مانگی نۆڤەمبەردا، گرووپە چەکدارە بەکرێگیراوەکان کە دڵسۆزی ئەنقەرەن، گۆڕانکارییە سیاسییەکانی دیمەشقیان قۆستەوە و هێرشیان کردە سەر ناوچەکانی ژێر دەسەڵاتی خۆبەڕیوەبەرییەکەی ڕۆژئاوا، کە سەرکەوتوو بوون لەکۆنتڕۆڵکردنی تەل ڕفعەت و مەنبەج، ئەمەش ترسی زیاتری فراوانبوونی ئۆپەراسیۆنە سەربازییەکانی دروستکرد، ئەگەرچی منبەج کۆنتڕۆڵکرایەوە.
سەرەڕای واژۆکردنی ئاگربەست بەنێوەندگیریی ئەمریکا، هێزەکانی سووریای دیموکرات، تورکیا و هاوپەیمانەکانی بە پێشێلکردنی ڕێککەوتنەکان و بەردەوامبوون لە هەڕەشەکردن لە شاری کۆبانی، تۆمەتبار دەکەن، کە ئەو شارە بەهێمای بەرەنگاربوونەوەی “داعش” ناسراوە.
لە هەوڵێکدا بۆ کەمکردنەوەی گرژییەکان، مەزلوم عەبدی، فەرماندەی هێزەکانی سووریای دیموکرات، ئامادەیی خۆی بۆ دامەزراندنی “ناوچەیەکی بێ چەک” لە کۆبانی ڕاگەیاند، ئەمەش لەچوارچێوەی دەستپێشخەرییەکدا کە ئامانج لێی هێورکردنەوەی نیگەرانییە ئەمنییەکانی تورکیایە.
گۆڕانکارییە سیاسییەکان لەدیمەشق
لە هەنگاوێکی جێی سەرنجدا، ئیدارەی خۆسەری ڕۆژئاوا، ئامادەیی خۆی بۆ هاوکاری لەگەڵ سەرکردایەتی نوێ لەدیمەشق دەربڕی هەڵکردنی ئاڵای سووریای لەسەر بارەگاکانیدا ڕاگەیاند، ئەمەش وەک هەوڵێک بۆ بەرەوپێشبردنی دیالۆگ و گەڕان بەدوای چارەسەرێکی سیاسی هەمەلایەنە.
مەزلوم عەبدی ڕایگەیاند؛ گۆڕانی سەرکردایەتی دەرفەتێکە بۆ بنیاتنانی سووریایەکی نوێ کە مافی هەموو سوورییەک زامن بکات، بەڵام سەرکردەکانی هەیئەی تەحریر شام کە ئێستا دەسەڵاتیان لە دیمەشق بەدەستە، هەر جۆرە فیدراڵییەتێکیان ڕەتکردەوە و جەختیان لەوەکردەوە کە ناوچەکانی ژێر دەسەڵاتی کورد دەخرێنەوە ناو حکومرانی نوێ.
ڕۆڵی تورکیا و پەرەسەندنی مەترسییەکان
ئێستا تورکیا بوونی سەربازی خۆی لە باکووری سووریا بەهێزتر دەکات، کە سوپاکەی بە 16 بۆ 18 هەزار سەرباز مەزەندە دەکرێت، لای خۆشییەوە ڕەجەب تەیب ئەردۆغان، سەرۆککۆماری تورکیا ڕایگەیاند، وڵاتەکەی یارمەتی سەرکردایەتی نوێ لە دیمەشق دەدات بۆ دووبارە بنیاتنانەوەی دەوڵەت و داڕشتنی دەستوورێکی نوێ، هاوکات جەختی لەسەر پێویستی نەهێشتنی “رێکخراوە تیرۆریستییەکان” کردەوە، بە ئاماژەدان بە یەکینەکانی پاراستنی گەل.
بەردەوامی فشارەکانی تورکیا و نەبوونی دیدێکی ڕوون لەلایەن سەرکردایەتی نوێ لە دیمەشق، ئایندەی خۆبەڕێوەبەریی کورد بە هەڵپەسێردراوی ماوەتەوە.
کورد لەبەردەم هەڵبژاردەیەکی قورسدایە لە نێوان دانوستان لەگەڵ دیمەشق لەژێر فشاری ئەنقەرە یان بەردەوامبوون لە پشتبەستن بەپشتیوانی ئەمریکا، سەرەڕای نەبوونی هێڵێکی دیار و ڕوونی ستراتیژی درێژخایەنی واشنتۆن.
