ئەنجوومەنی سەربازی مەنبج سەر بە هێزەكانی سووریای دیموكرات (هەسەدە) ئاشكرای دەكات، گرووپە چەكدارە سوورییەكانی سەر بە توركیا لە چەند میحوەرێك لە دەورووبەری بەنداوی تشرین هەڵاتوون و ژمارەیەكیشیان لێ دەستگیركراون.
ماڵپەڕی (عەفرین پۆست) بڵاویكردەوە، ژمارەیەک چەکدار کە سەر بە گرووپەکانی تورکیا بوون بڕیاریانداوە بگەڕێنەوە ناوچەکانی خۆیان و دواتر دەستەی تەحریری شام ڕێگەی پێداون بگەڕێنەوە بۆ حمس و حەما.
ئاماژەی بەوەشکردووە، ئەو چەکدارانە پێشتر سەر بە گرووپەکانی حەمزات و عەمشات بوون و لەنێو ڕیزی سووپای نیشتیمانیی سووریای هاوپەیمانی تورکیا بوون و نزیکەی 400 چەکدار بوون لە مەنبج بڕیاریانداوە دژی هەسەدە شەڕ نەکەن.
ناوەندی ڕاگەیاندنی هەسەدە بڵاویكردەوە، هێزەکانمان لە ئەنجوومەنی سەربازی مەنبج بە مشتێکی ئاسنین لە گرووپە چەكدارەكانی سەر بە توركیا دەدەن و لە پێگەی بەرگرییەوە بۆ پێگەی هێرشبەری لە هەموو میحوەرەكان دەجووڵێن.
ڕاشیگەیاندووە، هێزەکانمان لە گوندی قشلە نزیک بەنداوی تشرین گرووپێک لە چەكدارانی سەر بە داگیرکەری تورکیایان دەستگیركردووە.
