سەرۆكی هەرێمی كوردستان پێشوازی لە ئیسماعیل بێشكچی کرد و لە دیدارەکەدا “سوپاس و پێزانینی گه‌لی كوردستانی بۆ پشتگیری و به‌رگریكردنی له مافه‌كانی گه‌لی كورد دووپات كرده‌وه”.
سەرۆکایەتیی هەرێمی کوردستان بڵاویكردەوە، ئەمڕۆ یەک شەممە، نێچیرڤان بارزانی، سه‌رۆكی هه‌رێمی كوردستان لەگەڵ ئیسماعیل بێشكچی، بیرمه‌ند و كۆمه‌ڵناس و نووسه‌ری دیاری تورک و دۆستی گه‌لی كورد دیداری کردووە.
نێچیرڤان بارزانی، سوپاس و پێزانینی گه‌لی كوردستانی بۆ پشتگیری و به‌رگریكردنی له مافه‌كانی گه‌لی كورد دووپات كرده‌وه، هه‌روه‌ها ده‌ستخۆشیی له ئه‌رك و كاره‌كانی وه‌قفی ئیسماعیل بێشكچی، به‌تایبه‌تی له بواری كوردۆلۆژیدا كرد.
ئاماژە بەوەشکراوە، “لای خۆیه‌وه بێشكچی، خۆشحاڵیی خۆی به سه‌ردانی بۆ هه‌رێمی كورستان و پێشكه‌وتنه‌كانی ده‌ربڕی و جه‌ختی له پشتگیریی به‌رده‌وامی خۆی و وه‌قفی ئیسماعیل بێشكچی بۆ مافه ره‌واكانی گه‌لی كوردستان كرده‌وه، هه‌روه‌ها به گه‌شبینییه‌وه دید و بۆچوونی خۆی ده‌رباره‌ی داهاتووی گه‌لی كوردستان، خسته‌ڕوو”.
له دیداره‌كه‌دا، پارێزگاری هه‌ولێر و ژماره‌یه‌ك له مامۆستایانی زانكۆی سه‌ڵاحه‌دین و به‌ڕێوه‌به‌رانی وه‌قفی ئیسماعیل بێشكچی، ئاماده بوون.
